Aýanyń lastanýynan jyl saıyn 6,5 mln adam ajal qushýda
ASTANA. QazAqparat - Jer betindegi halyqtyń 92 paıyzy Dúnıejúzilik densaýlyq saqtaý uıymynyń sapa standarttaryna jaýap bermeıtin aýamen tynystaýda.
Osynyń saldarynan jyl saıyn 6 jarym mıllıon adam ajal qushady. Dúnıejúzilik densaýlyq saqtaý uıymynyń jańa esebinde osyndaı málimet jarııalandy.
«Jer betindegi árbir onynshy turǵyn ǵana aýa sapasy Dúnıejúzilik densaýlyq saqtaý uıymynyń talaptaryna sáıkes keletin aýdandarda turady. Eýropa men Soltústik Amerıkada aýany tazartý úshin kóp kúsh-jiger jumsaýda. Biraq bul áreketterdiń ózi mardymsyz. Ásirese Azııa, Afrıka men Jerorta teńiziniń ońtústiginde ómir súretin adamdar úlken zardap shegýde. Atalǵan málimetter spýtnıktik monıtorıng, hımııalyq saraptamalar jáne basqa ádis-tásilderdiń kómegimen alynǵan. Aýasy qatty lastanǵan turǵyndarda ınsýlt, júrek jáne onkologııalyq aýrýlar jıi ushyrasady. Keıbir azııalyq elderdiń bıligi ekologııalyq problemalarmen kúresýge kúsh salýda. Beıjińde 2020 jylǵa qaraı kómir óndirý kólemin 20 paıyzǵa azaıtyp, óndiristik qaldyqtar sanyn 50 paıyzǵa qysqartý josparlanyp otyr. Al Ońtústik Koreıa 2019 jylǵa deıin eski kólikter men dızeldi otynmen júretin avtobýstardan birjola bas tartpaq», - deıdi DDU ekologııalyq baqylaý departamentiniń basshysy Marııa Neıra.
«Habar 24» arnasy
