Aýanyń lastanýy adam ómirin orta eseppen 1 jylǵa qysqartady - sarapshy
ASTANA. QazAqparat – Aýanyń lastanýy saldarynan Qazaqstan jyl saıyn 2,5 mıllıard dollar joǵaltady. Mundaı derekti ekologııalyq uıymdar qaýymdastyǵynyń basqarma tóraǵasy Aıgúl Soloveva keltirdi, dep habarlaıdy QazAqparat tilshisi.
Bishkekte ótip jatqan Densaýlyq saqtaý jónindegi HІІ halyqaralyq konferentsııa barysynda Aıgúl Soloveva aýanyń lastanýy adam ómirin orta eseppen 1 jylǵa qysqartatyndyǵyn atap ótti.
«Dúnıejúzilik densaýlyq saqtaý uıymynyń esebine sáıkes, 2019 jyly aýanyń lastanýy búkil álem boıynsha 8,8 mıllıonǵa jýyq adamnyń ómirin qıdy. Ostındegi Tehas ýnıversıteti ǵalymdarynyń dereginshe, aýanyń jahandyq lastanýy adamnyń ómir súrý uzaqtyǵyn orta eseppen bir jylǵa qysqartady», - dedi ol konferentsııa barysynda.
Spıker ózge de statıstıkalyq derekterdi keltirdi. Máselen, Dúnıejúzilik banktiń málimetinshe, Qazaqstannyń tek tórt óńirinde – Almaty, Qaraǵandy, Pavlodar jáne Shyǵys Qazaqstan oblystarynda aýanyń lastanýynan jyl saıyn sozylmaly bronhıttiń 1 016 jańa jaǵdaıy tirkelip, 2 040 adam aýrýhanaǵa jatqyzylady. Jedel medıtsınalyq kómekke 40 myńnan astam adam júginedi. Munan bólek, 2 848 adam mezgilsiz ómirden ozsa, júrek-ókpe aýrýlarynan 2 665 ólim, ókpe obyrynan 183 ólim tirkeledi.
«2011 jyly keıbir qalada atmosferalyq aýanyń lastanýynan týyndaǵan mezgilsiz ólim-jitimdi esepke almaǵanda, lastanǵan aýanyń halyqtyń densaýlyǵyna áser etýinen bolǵan zalal Almatyda – 486 mln, Pavlodarda – 181 mln, Óskemende – 157 mln, Temirtaýda 154 mln dollardy qurady. Aýanyń lastanýynan týyndaǵan aýrýlardyń saldarynan respýblıkalyq zalal jyl saıyn 2,5 mlrd dollarǵa jetedi. Bul – jalpy ishki ónimniń 1,7 paıyzy», - dedi Aıgúl Soloveva.
Onyń paıymynsha, halyqqa sapaly jáne shynaıy ekologııalyq aqparat usyný qorshaǵan ortany qorǵaý salasyndaǵy saıasattyń negizgi baǵyttarynyń biri bolýy tıis.
