Aýadaı qajet dáriler joq: preparattardy tirkeý rásiminde shıkilikter anyqtaldy
ASTANA. KAZINFORM — Qazaqstanda dárini tirkeý úshin óte kúrdeli bıýrokratııalyq rásimderden ótý kerek. Bul týraly Parlament Májilisiniń jalpy otyrysynda depýtat Ashat Aımaǵambetov málim etti.
- Dári-dármek dárihanalarda satylýy úshin, eń aldymen, saraptamadan (Dárilik zattar men medıtsınalyq buıymdardy saraptaý ulttyq ortalyǵynda) jáne tirkeýden ótýi kerek. Aýdıt neni kórsetti? Normatıv boıynsha tirkeý merzimi - 210 kún. Alaıda, bireýler úshin bul merzim 1 275 kúnge sozylsa, osy uıymnyń burynǵy qyzmetkerleri úshin óte jyldam – 25 kúnde rásim ótkizildi. 154 ótinim boıynsha saraptama protsedýralaryn buzý derekteri anyqtaldy.
Jalpy, NATsELS (Dárilik zattar men medıtsınalyq buıymdardy saraptaý ulttyq ortalyǵy) - naǵyz saıahatshylar klýby sııaqty. Onyń qyzmetkerleri dárini tizimge engizý úshin zaýyttardy kórý syltaýymen shetelge baryp júr. Árıne, barlyq jaıly saıahat shyǵyndary farmatsııa kompanııasynyń esebinen tólenedi. Biraq bul saparlar ne bereteni túsiniksiz, - dedi A.Aımaǵambetov.
Onyń aıtýynsha, dárini tirkeý úshin óte kúrdeli bıýrokratııalyq rásimderden ótý kerek. Árıne, mundaı qıyndyqtardy tez arada tek alpaýyt farmatsevtıkalyq kompanııalar men qymbat preparattardy óndiretinder eńseredi. Nátıjesinde, arzan ári naýqastar úshin aýadaı qajet dáriler tirkelmeı qalady.
- Naryqta joq, óıtkeni ol úshin júgiretin ynta da, qyzyǵýshylyq joq. Máselen, Qazaqstanda «penıtsıllınniń» ishetin túri tirkelmegenin farmakologtar aıtyp otyr. Nege? Sebebi, ol tym arzan, eshkim ótinim bermeıdi. Osynyń kesirinen dárigerler birden keń aýqymdy antıbıotıkterdi jazyp berýge májbúr. Dál osyndaı jaǵdaı kóptegen bazalyq dári-dármek boıynsha qaıtalanady. Olar tizimde bolmaǵandyqtan, olardy paıdalana almaımyz. Bul preparattar arzandyǵyna baılanysty ındýstrııaǵa qyzyq emes dep te aıtýǵa bolady, - dedi depýtat.
Budan buryn habarlanǵandaı, QR Joǵary aýdıtorlyq palatasynyń tóraǵasy Álıhan Smaıylov Qazaqstanda azamattardy dári-dármekpen qamtamasyz etý júıesine júrgizilgen memlekettik aýdıt nátıjesin jarııalady.