Aýadaǵy jaǵymsyz ıis: Atyraý munaı óńdeý zaýytynda tekserý bastaldy

ATYRAÝ. QazAqparat – Atyraý munaı óńdeý zaýytynda jospardan tys tekserý bastaldy. Buǵan birneshe tún qatarynan jaǵymsyz ıistiń shyǵýy sebep bolyp otyr, dep habarlaıdy QazAqparat tilshisi.

Atyraý qalasynyń turǵyndary áleýmettik jelide túngi mezgilde jaǵymsyz ıistiń shyǵatyny týraly jazyp jatyr. Turǵyndardyń pikirinshe, kópshiliginde bas aýrýy, álsizdik, tipti júrektiń aınyǵany baıqalǵan.

Azamattardyń osyndaı shaǵymyna baılanysty oblystyq Ekologııa departamenti Atyraý munaı óńdeý zaýytyn jospardan tys tekserýdi bastady.

«Bizdiń departamenttiń qyzmetkerleri turǵyndardyń shaǵymyna baılanysty Atyraý munaı óńdeý zaýytynda jospardan tys tekserýdi bastady. Óıtkeni, turǵyndar munaı ónimderiniń ıisine shaǵymdandy. Budan basqa, zerthana qyzmetkerleri jeldiń baǵyty boıynsha atmosferalyq aýadan synama alady. Qazir jel ońtústik-batystan, ıaǵnı zaýyt ornalasqan baǵyttan soǵyp tur», - deıdi Atyraý oblysy boıynsha Ekologııa departamentiniń basshysy Álibek Bekmuhametov.

Buǵan deıin Atyraýda shóp órtenip, aýada kómirtegi totyǵy shekti mólsherden asyp ketkenin jazǵan edik.