Aýa jetpeıdi: Almatydaǵy sotta isi qaralǵan basqarma basshysy málimdeme jasady
ALMATY. KAZINFORM – Almatyda qala qurylysyn baqylaý jáne ýrbanıstıka basqarmasynyń burynǵy basshysy Almashan Ahmedjanov sotta densaýlyǵynyń nasharlaǵanyn aıtyp, medıtsınalyq saraptama taǵaıyndaý týraly ótinish bildirdi.
Qorǵaýshy taraptyń sýdıany isten shettetý týraly ótinishi qanaǵattandyrylmaǵan soń, búgingi sot protsessi Almaty qalasynyń Qylmystyq ister jónindegi mamandandyrylǵan aýdanaralyq sotynyń sýdıasy Baqythan Bákirbaevtyń tóraǵalyǵymen ótti.
Almashan Ahmedjanov sotta medıtsınalyq saraptama júrgizýdi surady.
— Ózimdi óte nashar sezinip turmyn. Qazir meni avtozakpen alyp ketedi, al ol jerde maǵan aýa jetpeıdi. Júrek aýrýym bar, úshinshi toptaǵy múgedekpin, — dedi ol.
Sottyń aıtýynsha, aıyptalýshynyń densaýlyǵynda ony budan ári qamaýda ustaýǵa múmkindik bermeıtindeı medıtsınalyq kórsetkishteri bolsa, qorǵaýshy tarap QAJK men prokýratýraǵa júginýge quqyly. Osy organdar sottalýshynyń densaýlyǵyn tekserýge tıis.
— Eger atalǵan mekemeler sotqa aıyptalýshyny budan ári qamaýda ustaýǵa bolmaıtyny týraly qorytyndy berse, onda sot bul ótinishti qarastyra alady, — dedi sýdıa.
Eske salaıyq, aldyn ala tyńdaý kezinde Almashan Ahmedjanovtyń advokattary densaýlyq jaǵdaıyna baılanysty ony úı qamaǵyna aýystyrýdy nemese basqa bultartpaý sharasyn tańdaýdy talap etken edi.
Búgin Almaty qalasynyń Qylmystyq ister jónindegi mamandandyrylǵan aýdanaralyq sotynda alty aıyptalýshyǵa qatysty isti qaıta qaraý bastaldy. Olardyń arasynda Almashan Ahmedjanov pen jer qatynastary basqarmasynyń burynǵy basshysy Ardaq Samambetov bar.
