Aýa raıynyń ystyq bolýyna baılanysty astyqtyń pisip jetilýi 10-15 kúnge alǵa jyljydy

Bul týraly búgin Úkimette ótken keńeste Aýyl sharýashylyǵy mınıstrliginiń jaýapty hatshysy Evgenıı Aman aıtty.

«Bıylǵy jyl joǵary temperatýralyq rejımmen jáne jaýyn-shashynnyń tapshylyǵymen erekshelendi. Osyǵan baılanysty astyqtyń pisip jetilýi 10-15 kúnge alǵa jyljydy», - dedi jaýapty hatshy. Onyń sózine qaraǵanda, Aqmola jáne Qaraǵandy oblystarynan ózge barlyq óńirler egin oraǵyna kirisip otyr, al ońtústik óńirde bul jumystar aıaqtalýǵa jaqyndap qaldy.

«Egin oraǵynyń bastapqy kúnderindegi astyq daqyldary egistigindegi shyǵymnyń 83 paıyzy jaqsy jáne qanaǵattanarlyq, al 12 paıyzy nashar jaǵdaıda bolyp otyr. Astyq daqyldarynyń 875 myń gektary nemese 5 paıyzy solyp qaldy. Bular negizinen qurǵaqshylyqtan zardap shekken Aqtóbe jáne Batys Qazaqstan oblystaryna tıesili», -dedi E. Aman.

Atap aıtqanda, tamyzdyń 16-yndaǵy jaǵdaı boıynsha 876,7 myń gektar jerdiń, nemese egin oraǵyna qamtylatyn jalpy aýmaqtyń 8 paıyzy oryldy. Ortasha túsim gektaryna 13,4 tsentnerden. Ótken jylǵa qaraǵanda 4,6 tsentnerge tómen.

«Oblys ákimdikteriniń boljamy boıynsha, býnkerlik salmaqta astyqtyń jalpy jıyntyǵy 15,4 mln. tonna deńgeıinde bolmaq. Onyń ishinde bıdaı óniminiń kólemi 12 mln. tonna shamasynda bolady dep kútilýde»,-dedi ol.