Aýa raıynyń nasharlaýyna baılanysty respýblıka avtojoldarynyń birqatary jabyldy
ASTANA. 4 qańtar. QazAqparat - Aýa raıynyń nasharlaýyna baılanysty respýblıka avtojoldarynyń birqatarynda qozǵalysqa shekteý qoıyldy, dep habarlady QR Tótenshe jaǵdaılar mınıstrliginiń baspasóz qyzmetinen.
«3 qańtar kúni saǵat 20:00-den bastap aýa raıynyń nasharlaýyna baılanysty (kóktaıǵaq, jol kórinýiniń tómendigi) Qaraǵandy-Pavlodar, Qaraǵandy-Jezqazǵan, Qaraǵandy-Qarqaraly avtojoldarynda kóliktiń barlyq túrleri úshin jabyldy. Al qalǵan baǵyttar boıynsha saǵat 20:00-den bastap qoǵamdyq jáne dızeldi kólikter úshin qozǵalysqa shekteý qoıyldy», - delingen vedomstvo aqparatynda.
Sonda-aq 3 qańtar kúni Pavlodar men Shyǵys Qazaqstan oblystarynda da joldar jabylǵan bolatyn. Degenmen QR TJM aqparatyna sáıkes, búgin tańǵy saǵat 7-den bastap atalǵan joldar kólik qozǵalysy úshin qaıta ashyldy.
