Aýa raıynyń qolaısyzdyǵynan qos óńirde 80 jol apaty tirkeldi
ASTANA. QazAqparat – Qaraǵandy jáne Pavlodar oblystarynda kesheden beri kóktaıǵaqqa baılanysty 81 jol-kólik oqıǵasy tirkeldi, dep habarlaıdy QazAqparat Polisia.kz saıtyna silteme jasap.
Qaraǵandy oblysynda bir táýlik ishinde 50 jol-kólik oqıǵasy bolyp, odan 17 adam ártúrli jaraqat aldy. Máselen, Qaraǵandy qalasynda 8 qarasha kúni saǵat 20:00 shamasynda 30 jastaǵy «Lada Vesta» avtokóliginiń júrgizýshisi Ýnıversıtet kóshesinen Buqar Jyraý dańǵylyna baǵyt alyp bara jatyp, retteletin jaıaý júrginshiler ótkelinde 17 jastaǵy jaıaý júrginshini qaǵyp ketti. Jábirlenýshi ártúrli dene jaraqattarymen aýrýhanaǵa jetkizildi. Al, tasjoldarda bolǵan apattardan qaıtys bolǵandar bar.
«Qaraǵandy-Qarqaraly tasjolynda kóktaıǵaq saldarynan araǵa 8 saǵat salyp eki jol-kólik oqıǵasy tirkeldi. Máselen, saǵat 9:50 shamasynda atalǵan tas joldyń 195-shaqyrymynda «Ravon Nexia» avtokóliginiń 50 jastaǵy júrgizýshisi aldyn ala boljam boıynsha joldyń qarsy baǵytyna shyǵyp, KamAZ júk kóligimen soqtyǵysqan. Saldarynan «Ravon Nexia» avtokóliginiń júrgizýshisi aýrýhanaǵa jetkizildi, atalǵan kóliktiń 61 jastaǵy jolaýshysy alǵan jaraqattarynan aýrýhanada kóz jumdy. Saǵat 18:26 shamasynda Sheshenqara-Aşysý tas jolynda «Lexus» jáne «Volkswagen Passat» kólikteriniń qatysýymen jol-kólik oqıǵasy boldy. Jol apaty saldarynan 62 jastaǵy «Volkswagen Passat» avtokóliginiń júrgizýshisi oqıǵa ornynda qaıtys boldy», - dep habarlady Qaraǵandy oblystyq PD Jergilikti polıtsııa qyzmeti basqarmasynyń bastyǵy Qýanysh Zárýbaev.
Pavlodar oblysynyń aýmaǵyndaǵy joldarda eki kún ishinde 31 oqıǵa tirkeldi.
«9 qarashada saǵat 6:15 shamasynda Pavlodar-Qyzylorda avtojolynda Shiderti kentiniń mańynda «Toyota Alphard» markaly eki avtokóliktiń qatysýymen JKO boldy. Jol apaty saldarynan 34 jastaǵy jolaýshy aýrýhanaǵa jetkizildi. Tekserý júrgizilip jatyr, saraptama taǵaıyndaldy», - dedi Pavlodar oblysy PD bastyǵynyń birinshi orynbasary Jasqaırat Qaıyrov.
Sol kúni saǵat 7:30 shamasynda Lımonnaıa kóshesindegi úıge qarama-qarsy jerde «Volksvagen Passat» markaly avtokóliktiń júrgizýshisi 14 jastaǵy balany qaqqan, ol rettelmeıtin jaıaý júrginshiler ótkeli arqyly joldyń júris bóliginen ótken. Bala aýrýhanaǵa jatqyzyldy. Tekserý júrip jatyr.
Osy oraıda, polıtsııa qyzmetkerleri kólik júrgizýshilerimen qatar, jaıaý adamdardy da saq bolýǵa shaqyrady.
«Jaıaý júrginshilerge qystyń bastalýymen júrgizýshilerge kólik quralyn júrgizý qıynyraq ekenin eskertemiz. Joldyń júrý bóliginde qozǵalatyn kóliktiń aldynan emes, baǵdarshamnyń jasyl belgisine ótýge shaqyramyz. Aýa raıynyń qolaısyzdyǵyna baılanysty avtokólik ıelerine jazǵy dóńgelekterin qysqy dóńgelekke aýystyrýǵa keńes beremiz», - dedi Jasqaırat Qaıyrov.
Foto: polisia.kz
