Aýa raıynyń qolaısyzdyǵyna qaramastan sanavıatsııa sábıdi qutqaryp qaldy - ShQO
ASTANA. QazAqparat - Shyǵys Qazaqstan oblysynyń Tarbaǵataı aýdanynda sanavıatsııa tikushaǵy aýa raıynyń qolaısyzdyǵyna qaramastan, jańa týǵan sábıdi Aqjar aýylynan oblys ortalyǵyna jetkizdi, dep habarlaıdy «QazAqparat» HAA tilshisi ShQO TJD baspasóz qyzmetine silteme jasap.
Tarbaǵataı aýdanynyń Aqjar aýylynda 7 aılyq náreste dúnıege kelgen. Shaqalaqty qutqarý úshin ony jedel túrde oblys ortalyǵyndaǵy aýrýhanaǵa jetkizý qajet bolǵan. Óskemen men aýyl arasyndaǵy jol 400 shaqyrym bolǵandyqtan, sábıdi kólikpen aýrýhanaǵa jedel jetkizý múmkin emes edi. Jergilikti dárigerlerge sanıtarlyq avıatsııaǵa júginýge týra kelipti.
«Aqjar aýylyna sanıtarlyq avıatsııa ushyp shyqqan. Alaıda qatty soqqan jel men tumannyń saldarynan AN-2 ushaǵy qona almady. Kelesi kúni «Kazavıaspas» AQ-nyń áýe kemesiniń komandıri Bolat Doskenov qalaı bolǵanda da mejeli jerge jetý qajet dep sheship, sanıtarlyq avıatsııa quramyndaǵy eki dárigermen jáne ınjenermen birge «EurocopterEC 145» tikushaǵymen ushyp shyqty», - dep habarlaıdy ShQO TJD baspasóz qyzmetindegiler.
Tikushaqqa ymyrt túskende qonýǵa týra kelgen. Sábı Óskemenge ýaqytynda jetkizilip, oǵan bilikti medıtsınalyq kómek kórsetilgen. Qazirgi ýaqytta náreste dárigerlerdiń jiti baqylaýynda.
