Aýa-raıynyń qolaısyzdyǵyna baılanysty birqatar óńirlerde jol qozǵalysy qıyndaýy múmkin
ASTANA. 26 naýryz. QazAqparat - QR ІІM Jol polıtsııasy komıteti 26-28 naýryz aralyǵynda aýa-raıynyń qolaısyzdyǵyna baılanysty birqatar óńirlerde jol qozǵalysy qıyndaýy múmkin ekenin eskertedi.
Qazgıdromettiń habarlaýynsha, 26 naýryz kúni Batys Qazaqstan jáne Atyraý oblystarynda jaýyn-shashyn, qarǵa ulasatyn jańbyr jaýady, tuman túsedi. 26-27 naýryz aralyǵynda Aqmola, Qostanaı, Soltústik Qazaqstan oblystarynda, 27 naýryzda Pavlodar oblysynda jaýyn-shashyn, ońtústik-batystan soǵatyn jel 15-20 m/s-qa deıin kúsheıip, ekpini 25 m/s-qa jetýi yqtımal. 28 naýryz túnde aýa temperatýrasy 7-12, keı jerlerde 17 gradýs aıaz bolady. Joldarda kóktaıǵaq ornaýy múmkin.
«Jol polıtsııasy júrgizýshilerge osyndaı jaǵdaıda jyldamdyqty azaıtyp, kólikter arasyndaǵy qashyqtyqty ustaýǵa keńes beredi», - dep atap ótti ІІM JPK baspasóz hatshysy Irına Lýkıanına. Sondaı-aq jol polıtsııasy qar tazalaý tehnıkasy jumysyn jáne qozǵalysyn tejemeý úshin júrgizýshilerden avtokólikterin joldyń shetinde qaldyrmaýyn suraıdy.
«Jaıaý júrginshilerge de saq bolyp, joldy tek ruqsat etilgen jerlerde kesip ótý qajet», dedi ІІM JPK baspasóz hatshysy.
