Aýa raıynyń qolaısyzdyǵy elorda turǵyndaryna Naýryz merekesin toılaý baǵdarlamasyna ózgerister engizdi
ASTANA. Naýryzdyń 22-si. QazAqparat /Aıdar Ospanalıev/ - Búgin Astana ákimdiginiń qyzmetkerleri aqparat quraldarynyń ókilderimen kezdesip, aýa raıynyń qolaısyzdyǵyna baılanysty Naýryz merekesin atap ótýge qatysty baǵdarlamaǵa birshama ózgerister engizilgendigin atap ótti,
dep habarlaıdy QazAqparat.
Ákimdik ókilderiniń aıtýynsha, Naýryz merekesine arnalǵan baǵdarlama boıynsha elordadaǵy «Han shatyry» ǵımaratynyń aldynda úlken sharalar uıymdastyrylyp, oǵan keminde 5 myń
adam qatysýy qajet bolatyn. Sonymen qatar onda naýryz sherýi baǵdarlamasy uıymdastyrylyp, onda 365 qyz bala arnaıy kıimmen shyǵyp, kóktemniń jáne ózge de jyl mezgilderiniń kelýine baılanysty teatrlandyrylǵan kórinis kórsetýi qajet edi. Ókinishke qaraı, aýa raıyn boljaýshy mamandar Naýryz merekesin atap ótetin kúni, ıaǵnı naýryzdyń 22-inde qatty jel turýy múmkin dep otyr. Al teatrlandyrylǵan kóriniske qatysatyn balalardyń kıimderdi jeńil. Aýa raıynyń sýyqtyǵy jas ónerpazdardyń densaýlyqtaryna zııanyn tıgizýi múmkin. Sherý saltanatyna sondaı-aq 100-den astam jylqy, 15 túıe qatystyrylýy kerek edi. Mamandardyń aıtýynsha, mereke kúni qatty jel turatyn bolsa, áshekeıi jabý jabylǵan jylqylar men túıeler úrkip, merekege jınalǵan jurttyń berekesin alýy múmkin. Qaýipsizdik sharalaryn saqtaý úshin Naýryz merekesine arnalǵan bul sherý baǵdarlamadan alyp tastaldy.
Al merekelik kontsert, qazaqtyń salt-dástúrlerindegi betashar, tusaý keser, besikke salý sııaqty sharalar
belgilengen baǵdarlama boıynsha uıymdastyrylady. Olar merekege arnaıy tigilgen 30 shaqty kıiz úılerde kórsetiledi. Sondaı-aq altybaqan tigilip, toǵyz qumalaq, aýdaryspaq sııaqty sporttyq oıyndar uıymastyrylady. Merekeniń negizgi sharalary ortalyq saıabaqta ótedi. Onda 40-tan astam saýda oryndary halyqqa qyzmet kórsetedi dep kútilýde. Sondaı-aq restorandar men meıramhanalarda tegin naýryz kóje taratylady. Merekelik sharalar ortalyq saıabaqtan bastap, «Báıterek» ǵımaratyna deıingi aımaqty qamtıdy. Qala boıynsha negizgi sharalar uıymdastyrylatyn aımaqty qosa alǵanda, mereke 17 jerde atap ótiletin bolady. Olar negizinen «Jastar» saraıynyń, «Atameken» etnomemorıaldyq kesheniniń, «Báıterek» ǵımaratynyń, Qarjy mınıstrliginiń aldynda, «Kóktal», «Óndiris» sııaqty móltek aýdandar men ózge de birqatar aımaqtarda uıymdastyrylady.
Ákimdik ókilderiniń sózderine qaraǵanda, ótken jyly Naýryz merekesine elordada 100 myńnan astam adam qatysqan. Ákimshilik qyzmetkerleri aýa raıynyń qolaısyzdyǵyna qaramastan merekeni atap ótýshiler sany bıyl da az bolmaıdy degen úmitte. Sebebi merekelik sharaǵa bıyl 70 mıllıon teńge jumsalypty. Alaıda Naýryzǵa qatysty resmı sharalar uıymdastyrylmaıtyn boldy.
