Aýa raıynyń qolaısyzdyǵy baılanysty eldiń birqatar óńirlerinde kúrejoldar jabyldy - QR KKM
ASTANA. 10 aqpan. QazAqparat /Gúlmıra Álıakparova/ - Aýa raıynyń qolaısyzdyǵy (boran, qatty jel) men kórý múmkindiginiń shektelýine baılanysty eldiń birqatar óńirlerinde kúre joldar jabyldy.
Bul týraly Kólik jáne kommýnıkatsııa mınıstrliginen habarlady. Máselen, Soltústik Qazaqstan oblysynda túski saǵat 12.00-den bastapavtokóliktiń barlyq túri úshin - «Kókshetaý - Rýzaevka» avtojolynyń «Rýzaevka - Aqmola oblysynyń shekarasy» (Kókshetaýǵa qaraı) ýchaskesi (61-196 km);
«RF shekarasy (Ekaterınbor) - Almaty» avtojolynyń «Qostanaı oblysynyń shekarasy (Sarykól aýylyna qaraı) - Aqmola oblysynyń shekarasy (Jaqsy aýylyna qaraı)» ýchaskesi (729-856 km);
«Jezqazǵan - Esil - Petropavl» avtojolynyń «Sergeevka - Aqmola oblysynyń shekarasy (Esil aýylyna qaraı)» ýchaskesi (595-719 km);
«Mamlıýtka - Qostanaı» avtojolynyń «Mamlıýtka - Qostanaı oblysynyń shekarasy (Troebratskıı aýylyna qaraı)» ýchaskesi (0-180km) jabyldy.
Qostanaı oblysynda boran men uıtqyma jeldiń saldarynan joldyń nashar kórinýi sebepti avtojoldarda kólik qatynasy áli de shekteýli.
Sondaı-aq Aqtóbe oblysynda avtokóliktiń barlyq túrine «Qandyaǵash-Embi-Shalqar-Yrǵyz» avtojolynyń «Embi-Shalqar» ýchaskesi (91-257 km) boıymen jáne «Qarabutaq-Denısovka-Rýdnyı-Qostanaı» avtojolynyń «Qarabutaq-Qostanaı oblysynyń shekarasy» ýchaskesimen (0-231 km) qozǵalysyna shekteý qoıyldy.
QR KKM, aýa raıy jaǵdaıy jaqsarǵansha alys saparlarǵa shyǵýdan bas tartyp, Qazaqstannyń gıdrometeorologııalyq qyzmetiniń habarlamalaryna nazar salyp otyrýǵa keńes berdi. Aıta keteıik, avtomobıl joldarynyń jabylǵan ýchaskeleri jóninde habarlardy «Qazaqavtojol» RMK-nyń táýlik boıǵy dıspetcherlik qyzmetinen (7172) 44-46-85 bilýge bolady.
