Aýa raıynyń qolaısyz bolýy sebepti aımaqtardaǵy avtojoldarda qozǵalystar shektelýde - TJM
ASTANA. Qańtardyń 28-i. QazAqparat - Aýa raıynyń qolaısyzdyǵyna baılanysty respýblıkanyń birqatar aımaqtarynda kúre joldar áli de jabyq,
dep habarlady búgin QR TJM-nyń baspasóz qyzmetinen.
Aıta keteıik, kóktaıǵaq jáne burqasynnyń bolýy saldarynan qańtardyń ótken 25-de jabylǵan Almaty oblysyndaǵy «Úsharal-Dostyq» avtojolynda kóliktiń barlyq túrleri úshin qozǵalystar áli de shektelýde.
Al keshe, qańtardyń 27-si kúni 12 saǵat 30 mınýtta Shyǵys Qazaqstan oblysynda aýa temperatýrasynyń kúrt tómendeýine baılanysty kóliktiń barlyq túrleri úshin respýblıkalyq mańyzdaǵy «Óskemen-Almaty» (768-615 shaqyrym aralyǵy), «Qaraǵandy-Aıagóz-Botaz» (704-525) avtojoldary jáne 18 saǵat 00 mınýttan bastap Semeı qalasyna alyp baratyn oblystyq mańyzdaǵy barlyq kúre joldar jabyldy.
Sondaı-aq osy kúni saǵat 22.00-de qardyń mol jaýýyna oraı Mańǵystaý oblysynan shyǵatyn barlyq tas joldarda qozǵalys shekteldi. «Oblys aýmaǵynda respýblıkalyq jáne oblystyq mańyzdaǵy avtojoldardy tazartý jumystaryna 925 adam men 125 tehnıka jumyldyryldy. Tirshilikti qamtamasyz etý nysandary qalypty rejimde jumys isteýde», dep anyqtady vedomstvonyń baspasóz qyzmetinen.
Kúnniń kúrt sýytýyna oraı, sonymen qatar Pavlodar jáne Soltústik Qazaqstan oblystarynda dızeldi jáne jolaýshylar kólikterine alys joldarǵa shyǵýǵa ruqsat etilmeýde.
