Aýa raıyna baılanysty ShQO-da túrli baǵyttaǵy 6 jolaýshylar poıyzy qozǵalysyn toqtatty
ASTANA. Naýryzdyń 9-y. QazAqparat - Aýa raıynyń buzylýyna baılanysty Shyǵys Qazaqstan oblysy Aıagóz aýdanynda birqatar baǵyttardaǵy 6 poıyzdyń qozǵalysy toqtatyldy,
dep habarlady Tótenshe jaǵdaılar mınıstrliginen.
Vedomstvonyń baspasóz qyzmetinen málim etkenindeı, jolaýshylar poıyzdarynyń júrý kesteleri atalmysh óńirde qarly boran bolýy sebepti buzylǵan.
Máselen, Aıagóz stansysynda ótken dúısenbi, naýryzdyń 8-i kúngi saǵat 23.55-ten bastap «Pavlodar-Almaty» baǵytyndaǵy №31-shi poıyz, naýryzdyń 9-y tańǵy saǵat 7 jarymnan bastap «Novosibir-Almaty» baǵytyndaǵy №325-shi jáne osy kúngi 9.00-den beri «Novosibir-Tashkent» baǵytyndaǵy №369-shy poıyzdar toqtap tur.
Sondaı-aq, Aqtoǵaı stansysynyń 30-shy razezinde naýryzdyń 8-i saǵat 14.35-ten bastap «Zaşıta-Almaty» baǵytyndaǵy №351-shi poıyzdyń qozǵalysy shekteldi.
Al Aqtoǵaı stansysynyń ózinde keshe, keshki saǵat 21.40-tan bastap №352-shi «Almaty-Zaşıta» jáne búgin tańerten saǵat 11.00-den bastap №312-shi «Qaraǵandy-Semeı» baǵyttaryndaǵy poıyzdar qozǵalystaryn toqtatýǵa májbúr boldy.
Qazirgi ýaqytta atalmysh ýchaskilerde qardan tazartý poıyzy jumys isteýde.
