Aýa raıyna baılanysty respýblıkalyq mańyzy bar 12 kúre joldyń ýchaskesi jabyldy
NUR-SULTAN. QazAqparat – Elimizdiń 7 óńirinde daýyldy eskertý jarııalandy. Bul jaıynda QR Tótenshe jaǵdaılar mınıstrliginiń resmı ókili Talǵat Ýálı málim etti, dep habarlaıdy QazAqparat tilshisi.
Onyń atap ótýinshe, 2021 jylǵy 10 naýryzda «Qazgıdromet» RMK derekteri boıynsha 7 óńirde, atap aıtqanda, Aqmola, Aqtóbe, BQO, Qaraǵandy, Qostanaı, Pavlodar jáne Soltústik Qazaqstan oblystarynda daýyldy eskertý jarııalandy.
«Qazirgi ýaqytta aýa raıynyń nasharlaýyna baılanysty (boran, qar, nashar kóriný, kóktaıǵaq) 6 óńirde respýblıkalyq mańyzy bar avtojoldardyń 12 ýchaskesi jáne 51 oblystyq mańyzy bar ýchaske jabyldy. Olar: Aqmola, Soltústik Qazaqstan, Qostanaı, Aqtóbe, Shyǵys Qazaqstan, Batys Qazaqstan oblystary», - dedi Talǵat Ýálı.
Mınıstrlik málimetinshe, Batys Qazaqstan oblysyndaǵy bekketterde 253 júk jáne jeńil avtokólik tur. Shuǵyl jumystarǵa TJM, ІІM, jol qyzmetterinen, jergilikti atqarýshy organdardan barlyǵy 423 adam jáne 301 tehnıka jumyldyrylǵan.
Halyqty eskertý maqsatynda aýa raıynyń nasharlaýy týraly 15 SMS-habarlamany taratylyp, «Dármen» mobıldik qosymshasy arqyly 17 habarlama jiberilgen. Ýaqytyly aqparattyq-psıhologııalyq kómek kórsetý úshin óńirlerde «Jedel baılanys jelisi» jumys isteıdi.
