Aýa raıyna baılanysty elorda mańyna avtobýs qatynasy toqtady
NUR-SULTAN. QazAqparat – Aýa raıynyń nasharlaýyna baılanysty Nur-Sultan qalasynyń irgesindegi eldi mekenderge qatynaıtyn № 315 jáne 316 avtobýs baǵdarlary ýaqytsha toqtady, dep habarlaıdy QazAqparat.
City Transportation Systems kompanııasynan málim etkendeı, atalǵan eki jolaýshy avtobýsynyń qozǵalysy búgin saǵat 11:40-tan bastap toqtatyldy.
«Qala mańyna qatynaıtyn basqa baǵdarlar lınııada», - dedi kompanııadan.
Aıta keteıik, burqasyn men qatty jelge baılanysty búgin Nur-Sultan – Temirtaý trassasy jabyldy. Sondaı-aq Aqmola oblysynyń óńirindegi boranǵa baılanysty keshe blokpostarda 400-ge jýyq kólik keptelisi qalyptasty. 200-ge jýyq adam qutqaryldy.
