Aýa raıyna baılanysty Aıagóz stansysynda kidirýge májbúr bolǵan 6 poıyz qozǵalystaryn bir táýlikten astam ýaqyttan keıin jalǵastyrdy

dep habarlady Qazaqstannyń Tótenshe jaǵdaılar mınıstrliginen.

Esterińizge sala keteıik, naýryzdyń ótken 8-i men 9-y kúnderi ShQO-da qarly borannyń bolýy sebepti túrli baǵyttaǵy 6poıyz júrý kestelerin buzýǵa májbúr boldy.

Máselen, Aıagóz stansysynda ótken dúısenbi, naýryzdyń 8-i kúngi saǵat 23.55-ten bastap «Pavlodar-Almaty» baǵytyndaǵy №31-shi poıyz, naýryzdyń 9-y tańǵy saǵat 7 jarymnan bastap «Novosibir-Almaty» baǵytyndaǵy №325-shi jáne osy kúngi 9.00-den beri «Novosibir-Tashkent» baǵytyndaǵy №369-shy poıyzdar toqtap turdy.

Sondaı-aq Aqtoǵaı stansysynyń 30-shy razezinde naýryzdyń 8-i saǵat 14.35-ten bastap «Zaşıta-Almaty» baǵytyndaǵy №351-shi poıyzdyń qozǵalysy shekteldi.

Al Aqtoǵaı stansysynyń ózinde naýryzdyń 8-i, keshki saǵat 21.40-tan bastap №352-shi «Almaty-Zaşıta» jáne naýryzdyń 9-y tańerteńgi saǵat 11.00-den bastap №312-shi «Qaraǵandy-Semeı» baǵyttaryndaǵy poıyzdar qozǵalystaryn toqtatty.

150 adamnyń, 8 tehnıka men qardan tazartý poıyzynyń kómegimen bolat joldar tazalanǵannan keıin, naýryzdyń 9-y 22 saǵat 50 mınýt pen naýryzdyń 10-y 02 saǵat 50 mınýt aralyǵynda poıyzdar óz baǵyttary boıynsha qozǵalystaryn jalǵastyrdy.

Aıta keteıik, tótenshe oqıǵa saldarynan jolaýshylar poıyzdary kestelerinen bir táýlikten astam ýaqytqa keshikti.