Aýa raıy: Juma kúni Qazaqstannyń basym bóliginde qar jaýady
NUR-SULTAN. QazAqparat – Juma kúni Qazaqstannyń basym bóliginde qar jaýady, jel kúsheıedi, dep habarlaıdy QazAqparat Qazgıdrometke silteme jasap.
25 jeltoqsanda soltústik jáne ońtústik tsıklondar jyralarynyń jáne soǵan baılanysty atmosferalyq aǵyndardyń áserinen respýblıkanyń basym bóliginde qar jaýady. Keı jerlerde tuman túsip, jel kúsheıedi, soltústikte jáne shyǵysta jaıaý burqasyn soǵady, ońtústikte kóktaıǵaq bolýy yqtımal. Tek elimizdiń batysy men ońtústik-shyǵysynda antıtsıklon jotasynyń yqpalynan kún raıy ashyq bolady.
Aqmola, Pavlodar, Shyǵys Qazaqstan oblystarynyń keı jerlerinde jaıaý burqasyn soǵady, Aqmola, Pavlodar oblystarynda tuman túsýi múmkin. Túrkistan oblysynyń keı jerlerinde tuman túsedi, kóktaıǵaq bolady, tańerteń jáne kúndiz jel 15-20 m/s kúsheıedi.
Jambyl, Mańǵystaý, Atyraý, Batys Qazaqstan, Aqtóbe, Qostanaı, Soltústik Qazaqstan, Qaraǵandy, túnde jáne tańerteń Almaty oblystarynyń keı jerlerinde tuman túsedi, Jambyl oblysynda kóktaıǵaq bolýy yqtımal.
Túnde Almaty, Mańǵystaý oblystarynyń keı jerlerinde qatty aıaz bolady.
