Aýa raıy: SQO-da aıazǵa baılanysty eskertý jasaldy
PETROPAVL. QazAqparat - Sınoptıkter Soltústik Qazaqstan oblysynda aýa-raıyna baılanysty aldaǵy úsh kúnge eskertý jasady, dep habarlaıdy QazAqparat tilshisi.
«Qazgıdromet» RMK fılıaly sınoptıkteriniń málimetinshe, 5 aqpan kúni aımaqtyń keı jerlerinde burqasyn bolyp, soltústik-shyǵystan sekýndyna 15-20 metrge deıin jel soǵady. Túnde jel ekpini 25 m/s deıin jetedi. Kúndiz jáne túnde aýa temperatýrasynyń 30-35 gradýsqa deıin tómendeýi múmkin.
6 jáne 7 aqpan kúnderi Soltústik Qazaqstan oblysynda 37-42 gradýsqa deıin qatty aıaz bolady, keı jerlerde termometr baǵany 45 gradýstan tómen túsýi yqtımal. Daýyl turý yqtımaldylyǵy - 90-95 paıyz.
Buǵan deıin sınoptıkter soltústikqazaqstandyqtardy qystyń sońǵy aıynda aýa-raıynyń salqyndaýy týraly eskertý jasaǵan bolatyn.
