Aýa raıy: Senbide jel kúsheıip, qar jaýady
ASTANA. QazAqparat - Sınoptıkterdiń boljaýynsha senbide elimizde jel kúsheıip, tuman túsedi, qar jaýady, kóktaıǵaq bolady, dep habarlaıdy QazAqparat.
«3 qarashada Qazaqstannyń basym bóligi belsendi aǵyndar aımaǵynyń yqpalynda bolýyna baılanysty qubylmaly aýa raıy saqtalady, qar jaýady, tek elimizdiń batysy men ońtústiginde kún raıy ashyq. Keı jerlerinde ekpindi jel soǵyp, tuman túsedi, kóktaıǵaq bolady, burqasyn soǵady», - delingen Qazgıdromet habarlamasynda.
Aqmola, Qostanaı, Soltústik Qazaqstan oblystarynyń keı jerlerinde kóktaıǵaq bolady, burqasyn soǵýy yqtımal, jeldiń jyldamdyǵy sekýndyna 15-20 metrge jetedi, Aqmola oblysynda túnde jel 25 m/s deıin údeıdi. Qaraǵandy, Shyǵys Qazaqstan oblystarynyń keı jerlerinde burqasyn soǵady, túnde keı jerlerde tuman túsýi yqtımal, jeldiń ekpini 15-20 m/s, Qaraǵandy oblysyndaǵy keı jerlerde - kóktaıǵaq bolady, kúndiz Shyǵys Qazaqstan oblysynyń jekelegen aýdandarynda jeldiń ekpini 25 m/s jetedi. Pavlodar oblysynda keı jerlerde burqasyn, kóktaıǵaq kútiledi, jel 15-25 m/s kúsheıedi.
Jambyl, Túrkistan, Qyzylorda, túnde Almaty oblystarynyń keı jerlerinde tuman kútiledi, Jambyl oblysynyń keı jerlerinde kóktaıǵaq bolady, kúndiz jeldiń jyldamdyǵy 15-20 m/s.
