Aýa raıy: Qostanaıda jedel shtab quryldy
QOSTANAI. QazAqparat - Aýa raıynyń kúrt ózgerýine baılanysty Qostanaıda jedel shtab quryldy, dep habarlaıdy QazAqparat Qostanaı oblysynyń Tótenshe jaǵdaılar departamentiniń (TJD) Memlekettik til jáne aqparat bólimine silteme jasap.
TJD bastyǵynyń orynbasary Azamat Orymbaevtyń aıtýynsha, aımaqta qalyptasqan temperatýranyń tómen bolýyna baılanysty barlyq avarııalyq-qutqarý bólimsheleriniń qaraýyldary kúsheıtilgen. Jaýyngerlik esepke rezervtik tehnıka engizildi.
«Oblys joldarynda jáne eldi mekenderde múmkin bolatyn shtattan tys jaǵdaılardy joıý úshin Qostanaı garnızonynyń barlyq jeke quramy jumyldyrylatyn bolady. Qostanaı oblysy TJD bastyǵynyń ókimimen 5 aqpannan bastap oblystyq jedel shtab jumys isteıdi, oǵan jol uıymdarynyń, azamattyq qorǵaý qyzmetteriniń jáne ishki ister organdarynyń ókilderi kirdi. Arnaıy tehnıka, ótimdiligi joǵary avtomobılder, jyljymaly elektr stantsııalary daıyndaldy. Respýblıkalyq mańyzy bar tasjol ýchaskelerinde qatty aıaz bolǵan jaǵdaıda halyqqa qajetti kómek kórsetý úshin 14 jylytý beketteri ornatyldy. Sondaı-aq qysqy kezeńde tótenshe jaǵdaılar týyndaǵan jaǵdaıda áreket etý jospary ázirlendi», - deıdi Azamat Orymbaev.
Jalpy, jyl basynan beri oblys aýmaǵynda 67 órt tirkeldi. Órt kóp jaǵdaıda turǵyn úı sektorynda bolady. Soǵan baılanysty oblystyq TJD jylytý maýsymynda órt qaýipsizdigi qaǵıdalaryn oryndaý qajettiligi týraly eske salady. Aıazdy kúnderi peshter men jylytý quraldaryn paıdalaný kezinde asa saq bolý kerek. Aqaýly elektr symdaryn paıdalanýǵa jol bermeý. búldirshinderdi qaraýsyz qaldyrmaý kerek.
Aıta keteıik, TJD aýa raıynyń buzylatyny týraly oblys turǵyndaryn ýaqytyly qulaqtandyrǵanyna qaramastan, aımaqta oqys jaıttar tirkelip otyr.
