Aýa raıy astyq bastyrýǵa kedergi keltirýde - A.Mamytbekov
«Aýa raıy jıyn-terim jumystaryna qatty yqpal etedi. Eń aldymen, egistik jumystary bastalǵan kezde aýa raıy áser etti. Sonyń saldarynan dán sebý merzimi shegerilip, ol jıyn-terimniń de keıinge yǵystyrylýyna túrtki boldy. Óıtkeni, astyq ádettegi merziminde pisip úlgermedi. Qazirgi jaýyn-shashyn fermerlerge zor ábiger ákelýde», - dedi mınıstr.
Onyń aıtýynsha, dıqandar astyqty jańbyr basylǵan sátterde bastyrý ústinde.
«Bizdiń dıqandarymyz dymqyl astyqty orýǵa májbúr. Bul keptirý shyǵystaryn ulǵaıtady jáne astyq sapasyna da keri áserin tıgizedi. Menińshe, aǵymdaǵy jyly jıyn-terim astyqtyń biraz bóligi qar astynda qalǵan ótken jylmen salystyrǵanda birshama jaqsy ótedi. Biraq, munan da bizdiń fermerlerimiz saqtandyrylmaǵan. Biz aýa raıyna barynsha táýeldimiz», - dedi A.Mamytbekov.
Aýyl sharýashylyǵy mınıstri teńge baǵamynyń ózgerýi astyq bastyrý naýqanyna qalaı áser etkendigine qatysty túsinik berdi.
«Negizgi shyǵystar teńgeniń eski baǵamymen jasaldy jáne ınflıatsııalyq targetteý bolmaǵan jaǵdaıda qazir álemdik naryqtaǵy astyq baǵasynyń quldyraýyna baılanysty, onyń baǵasy birshama tómen bolar edi. Búginde Parıj bırjasynda úshinshi synypty astyq shamamen 165 dollar, Chıkago bırjasynda shamamen 170 dollardy quraıdy. 1 dollardy shamamen 250-260 teńge dep esepteıtin bolsaq, onda búgingi Qazaqstandaǵy baǵa álemdik baǵaǵa saı keledi», - dedi A.Mamytbekov.