Aýa raıy: Aldaǵy úsh kúnde de jańbyr tolastamaıdy
NUR-SULTAN. QazAqparat - Sınoptıkter 11-13 maýsymǵa arnalǵan aýa raıy boljamyn jarııa etti, dep habarlaıdy QazAqparat Qazgıdrometke silteme jasap.
Bıiktiktegi barıkalyq qoınaýǵa baılanysty Qazaqstannyń batys oblystarynan basqa óńirlerde toqtaýsyz jaýyn jaýdy. Sol arqyly Barents teńizi men Jaıyqtyń soltústiginen troposferalyq salqyn jáne ylǵal aýa kelýde.
Aldaǵy úsh táýlikte respýblıkaǵa salqyn jáne ylǵal aýa keletindikten aýa raıy qazirgisinen ózgermeıdi. Burynǵydaı elimizdiń basym bóliginde qubylmaly aýa raıy bolady, naızaǵaıly ótkinshi jańbyr, respýblıkanyń taýly aımaqtary men taý bókterlerinde qatty nóser kútiledi.
Aýa temperatýrasy ortasha kópjyldyq mánnen 3...5°S tómen saqtalady.
Tek batys jáne ońtústik batysta joǵarǵy atmosferalyq qysymnyń áserinen jaýyn-shashynsyz jáne ystyq aýa raıy kútiledi, kúndiz aýa temperatýrasy 30...38°S deıin joǵarylaıdy.
