Aýa raıynyń nasharlaýyna baılanysty úsh óńirde joldar jabylady
ASTANA. KAZINFORM — Aýa raıynyń nasharlaýyna baılanysty taǵy úsh óńirde, atap aıtqanda Aqmola, Qaraǵandy jáne Pavlodar oblystarynda kólik qozǵalysyna shekteý qoıylady. Bul týraly «QazAvtoJol» UK basapasóz qyzmeti habarlady.
— 2024 jylǵy 21 qarashada saǵat 17:30–da aýa raıynyń buzylýyna baılanysty «Ekaterınbýrg-Almaty» avtojolynyń 1353-1426 shaqyrym aralyǵynda (Aqmola oblysynyń shekarasynan Temirtaý tólemaqy alý pýnktine deıin) kóliktiń barlyq túriniń qozǵalysyna shekteý qoıylady. Sonymen qatar, 2024 jylǵy 21 qarashada saǵat 17:30–da Qaraǵandy oblysynda aýa raıynyń buzylýyna baılanysty «Ekaterınbýrg-Almaty» avtojolynyń 1291-1353 shaqyrym aralyǵynda (Jibek Joly tólamqy alý pýnktinen Qaraǵandy oblysynyń shekarasyna deıin) kóliktiń barlyq túriniń qozǵalysyna shekteý qoıylady. Joldardy 2024 jylǵy 22 qarasha saǵat 08:00–de ashý josparlanǵan, — delingen habarlamada.
Budan bólek, 2024 jylǵy 21 qarashada saǵat 18:00–de aýa raıynyń buzylýyna baılanysty «Ekaterınbýrg-Almaty» avtojolynyń 1426-1457 shaqyrym aralyǵynda (Temirtaý tólemaqy alý pýnktinen Qaraǵandy qalasyna deıin) júk jáne jolaýshylar kólikteriniń qozǵalysyna shekteý qoıylady. Joldy 2024 jylǵy 22 qarasha saǵat 07:00–de ashý josparlanǵan.
— «Qazgıdromet» boljamdaryna sáıkes aýa raıy jaǵdaılarynyń nasharlaýyna baılanysty (kórinýdiń shektelýi, ústińgi qar, burqasyn, kóktaıǵaq), avtokóliktiń barlyq túrleri úshin qozǵalys jabyldy jáne respýblıkalyq mańyzy bar a/j 10 ýchaskesinde (Aqmola, Qaraǵandy) júk jáne qoǵamdyq avtokólik úshin qozǵalys shekteldi. Pavlodar oblysynda jabý josparlanýda, — delingen Tótenshe jaǵdaılar mınıstrligi taratqan habarlamada.
TJM qaýipsizdik sharalaryn saqtaýǵa keńes beredi.
— Daýyldy eskertý jarııalaǵan kezde, ásirese qarańǵy ýaqytta alys jerlerge saparǵa shyǵýdan bas tartyp, jaıaý júrýden aýlaq bolyńyzdar. Aýa raıy jaǵdaıy men avtojoldardaǵy kólik qozǵalysynyń shekteýleri týraly aqparatty baqylańyzdar, — dep eskertti vedomstvo.
Eske salsaq, budan buryn Qaraǵandy oblysynda aýa raıynyń buzylýyna baılanysty «Ekaterınbýrg-Almaty» avtojolynyń 1505-1610 shaqyrymy aralyǵynda (Novostroıka aýyly — Aqsý-Aıýly aýyly) júk jáne qoǵamdyq kólikterdiń qozǵalysyna shekteý qoıylǵany belgili boldy.