Aýa raıynyń qolaısyzdyǵyna baılanysty qosymsha poıyzdar jolǵa shyǵady
ASTANA. KAZINFORM – Aýa raıynyń qolaısyzdyǵyna baılanysty «Jolaýshylar tasymaly» AQ qala mańyny baǵyty boıynsha qosymsha poıyz qosady - dep habarlady «Jolaýshylar tasymaly» AQ baspasóz qyzmeti.
Aldaǵy demalys kúnderi kútiletin qolaısyz aýa raıyna baılanysty «Jolaýshylar tasymaly» AQ Býrabaı kýrorty baǵyty boıynsha azamattardy tasymaldaý úshin qosymsha elektr poıyzyn engizý týraly sheshim qabyldady.
Býrabaı kýrorty stantsııasyna deıin №7553/7556 «Qaraǵandy-Astana» elektr poıyzynyń qozǵalysy uzartylady (ataýy №6811/6812 «Astana-Býrabaı kýrorty»). Bıyl 26 jáne 28 qańtarda poıyz Astanadan saǵat 10:10-da shyǵyp, Býrabaıǵa saǵat 13:20-da keledi. Osy kúnderi keri baǵytta poıyz Býrabaıdan saǵat 14:48-de ketip, Astanaǵa saǵat 17:54-te keledi. Elektr poıyzda jolaýshylarǵa 274 oryn usynylady.
Qosymsha elektr poıyzdarǵa bıletterdi satý 25 qańtar kúni saǵat 21:00-de bastaldy.
«Jolaýshylar tasymaly» AQ jolaýshylar aǵyny ulǵaıǵan jaǵdaıda Astana, Qaraǵandy jáne Pavlodardan 44 qosymsha vagondy qosatyn bolady. Bul qosymsha vagondar 2 myńǵa deıin jolaýshyny tasymaldaýǵa múmkindik beredi.
Bıletterdi bilet.railways.kz saıtynan jáne bılet kassalarynda satyp alýǵa bolady.
Vokzaldar men poıyzdarda jolaýshylar aǵynynyń kúrt ulǵaıýyn eskere otyryp,«Jolaýshylar tasymaly» AQ azamattarǵa aýa raıy jaǵdaılaryn elep, óz saparlaryn aldyn ala josparlaýdy jáne jolaýshylardyń qaýipsizdigin qamtamasyz etýge baǵyttalǵan sharalarǵa túsinistikpen qaraýdy suraıdy.
Anyqtamalyq aqparatty «1433» tegin nómiri, «KTZH_PP_BOT» bot jedelhattary, sondaı-aq, «Jolaýshylar tasymaly» AQ @jolaushylar_tasymaly resmı Instagram-akkaýnty arqyly bilýge bolady.
