Aýa raıynyń qolaısyzdyǵyna baılanysty Qaraǵandy áýejaıy jabyldy

Búgin tańerteńnen beri Qaraǵandydaǵy “Sary-Arqa” halyqaralyq áýejaıy jabyq, dep habarlaıdy Kazinform. 

Áýe aılaǵy jumysyn tústen keıin jandandyrýdy josparlap otyr. Áýejaı deregi boıynsha, boran men kóktaıǵaqqa baılanysty Fly Arystan kompanııasynyń Almatyǵa reısi keıinge qaldy. Sondaı-aq áýejaı qolaısyz aýa raıyna baılanysty osy áýe kompanııasynyń Almatydan keletin reısin qabyldaı almady.

Qazir áýejaı qyzmetkerleri ushý jolaǵyn muz ben qardan tazalap jatyr.

Áýe aılaǵy 3117 «Qaraǵandy-Jezqazǵan» reısin 15.00-de, al 7122 «Qaraǵandy-Almaty» reısin 17.00-de ushyrýdy josparlap otyr.

Qazgıdromet habarlaýynsha, Qaraǵandy oblysynda 14 qańtarda aýa raıyna baılanysty eskertý jarııalandy.

Sınoptıkter burqasyn, kóktaıǵaq jáne kúndiz sekýndyna 23-28 metrge jetetin jel soǵady dep boljaǵan.

Buǵan deıin óńirde tasjoldardyń bes bóligi jabylǵany habarlanǵan bolatyn.