Aýa raıynyń qolaısyzdyǵyna baılanysty Aqmola polıtseıleri júrgizýshilerge eskertý jasady
ASTANA. KAZINFORM — Aqmola oblysynyń polıtseıleri qolaısyz aýa raıynda júrgizýshilerdi jol qozǵalysy erejelerin saqtaýǵa, jyldamdyqty tómendetýge, kólikter arasyndaǵy qashyqtyqty arttyrýǵa, kúrt manevr men tejelýden aýlaq bolýǵa shaqyrdy, dep habarlaıdy Kazinform agenttiginiń tilshisi.
Sondaı-aq jazǵy dóńgelekterdi qysqy dóńgelekterge ýaqytyly aýystyrý qajettigin eskertti.
«Qazgıdromet» RMK málimetinshe, 6 qarashadan 7 qarashaǵa qaraǵan túni Aqmola oblysynda aýa raıy nasharlaıdy dep boljanyp otyr. Atap aıtqanda, aýa temperatýrasy tómendep, jańbyr sońy qarǵa ulasady. Jol boıynda sý jınalyp, kóktaıǵaq bolýy múmkin.
Bul týraly óńir júrgizýshilerine úndeý jasaǵan Aqmola oblysy Polıtsııa departamenti Ákimshilik polıtsııa basqarmasynyń bastyǵy Erjan Qoshqarbaev málimdedi.
Osyǵan baılanysty aqmolalyq polıtseıler kólik ıelerin qaýipsizdik sharalaryn kúsheıtýge shaqyrdy. Aýa raıynyń qubylýy, jaýyn-shashyn men kóktaıǵaqtyń paıda bolýy joldaǵy jaǵdaıdy edáýir qıyndatýy múmkin. Mundaı kezde júrgizýshilerden tipti úırenshikti baǵyttarda da barynsha muqııat ári saq bolý talap etiledi.
— Júrgizýshilerdi jol qozǵalysy erejelerin saqtaýǵa, jyldamdyqty tómendetýge, kólikter arasyndaǵy qashyqtyqty arttyrýǵa, kúrt manevr men tejelýden aýlaq bolýǵa shaqyramyz. Jazǵy dóńgelekterdi qysqy dóńgelekterge ýaqytyly aýystyrýǵa erekshe nazar aýdarý qajet. Tómen temperatýrada jazǵy shınalar jolmen senimdi ilinisýdi qamtamasyz ete almaıdy. Bul jol-kólik oqıǵalarynyń qaýpin arttyrady, — dedi Erjan Qoshqarbaev.
Polıtseıler jaıaý júrginshiler ótkelderine, jol qıylystaryna, qoǵamdyq kólik aıaldamalaryna jaqyndaǵanda, sondaı-aq kópirlerde, burylystarda, órler men eńisterde erekshe saq bolý qajettigin eskertti.
Sonymen qatar polıtsııa júrgizýshilerdi ózderiniń kólik júrgizý daǵdylaryn asyra baǵalamaýǵa, ýaqyt únemdeý úshin táýekelge barmaýǵa shaqyrdy. Múmkindik bolsa, asa qajettilik bolmasa, jolǵa shyqpaǵan jón.
Eske salaıyq, buǵan deıin ShQO-da qarasha aıynda aýa raıy jaýyndy biraq jyly bolatyny habarlandy.
