Qolaısyz aýa raıyna baılanysty Aqmola oblysynda joldaǵy jyldamdyqqa shekteý engizildi

ASTANA. KAZINFORM — «Astana – Kókshetaý – Petropavl» avtojolynyń belgili bir bóliginde saǵat 16:00-den bastap aýa raıynyń nasharlaýyna baılanysty jyldamdyq shekteýi 110-nan 80 km/saǵ deıin tómendetildi. Bul týraly «QazAvtoJol» UK» AQ baspasóz qyzmeti málim etti. 

— Saǵat 16:00-den bastap Aqmola oblysynda aýa raıynyń nasharlaýyna baılanysty respýblıkalyq mańyzy bar «KAZ02 Astana – Kókshetaý (aınalma jol) – Petropavl – RF shekarasy (Jańa Jol ótkizý pýnkti)» avtojolynyń 19–231 shaqyrym aralyǵynda kóliktiń barlyq túrleri úshin jyldamdyq shekteýi 110 km/saǵ-tan 80 km/saǵ-qa deıin tómendetiledi, - delingen habarlamada.

Jyldamdyq rejımin 2025 jylǵy 3 qarasha kúni saǵat 21:00-de qaıta qalpyna keltirý josparlanǵan. Bul aýa raıynyń turaqtanýyna jáne qozǵalys qaýipsizdiginiń qamtamasyz etilýine baılanysty júzege asyrylady.

Aıta keteıik, aldaǵy kúnderi eldiń basym bóliginde jaýyn-shashyn (negizinen qar) men jeldiń kúsheıýi boljanady. Respýblıka boıynsha tuman, kóktaıǵaq, al soltústik óńirlerde jaıaý burqasyn kútiledi.