Aýa raıyna baılanysty Túrkistan oblysynda júk kólikteriniń qozǵalysy shekteldi
TÚRKІSTAN. KAZINFORM — Kún raıynyń buzylýyna baılanysty 2025 jyly 9 jeltoqsan túngi saǵat 23:00–den bastap Jambyl oblysymen shekaralas Túrkistan oblysy Mashat aýyly (593-654 km) jol ýchaskesinde júk kólikteriniń qozǵalysyna shekteý engizildi.
— Jambyl oblysynyń Kúıik asýynda qar jaýyp, jel turyp, joldyń taıǵaq bolýyna baılanysty Túrkistan-Shymkent baǵytynan Taraz-Almaty baǵytyna qaraı júk kólikterine shekteý qoıyldy, — dedi oblystyq Polıtsııa departamenti patrýldik polıtsııa batalonynyń qyzmet ınspektory Jánibek Isaev.
Polıtsııa ókilderi júrgizýshilerdi barynsha muqııat bolýǵa, óz kólikterin qysqy kezeńge jáne kólik quraldarynyń tehnıkalyq jaǵdaıyna aldyn ala daıyndaýǵa shaqyrady.
Budan buryn 10 jeltoqsanda birqatar óńirde tuman túsip, kóktaıǵaq bolatynyn habarlaǵan edik.