Aýa raıyna baılanysty eki óńirde kólik qozǵalysyna shekteý qoıyldy

ASTANA. KAZINFORM — «QazAvtoJol» aýa raıynyń nasharlaýyna baılanysty birneshe óńirde kólik qozǵalysyna shekteý qoıylǵanyn habarlady.  

— 2026 jylǵy 6 qańtar saǵat 03:30–da aýa raıynyń buzylýyna baılanysty respýblıkalyq mańyzy bar kelesi avtojoldarda barlyq kólik túrleri qozǵalysyna shekteý engiziledi, — delingen habarlamada.

Aqmola oblysy:

— «Astana — Kókshetaý — Petropavl — RF shekarasy» avtomobıl jolynyń 304-341 shaqyrym aralyǵyndaǵy ýchaskesi (Kókshetaý qalasynan Soltústik Qazaqstan oblysynyń shekarasyna deıin);

Sondaı-aq 03:45–te «Kókshetaý-Atbasar» 0-184 shaqyrym aralyǵy (Kókshetaý qalasynan Atbasar qalasyna deıin) barlyq kólik túrleriniń qozǵalysyna shekteý engizildi.

Soltústik Qazaqstan oblysy:

— «Astana — Kókshetaý — Petropavl — RF shekarasy» avtomobıl jolynyń 341-473 shaqyrym aralyǵyndaǵy ýchaskesi (Aqmola oblysynyń shekarasynan Beskól eldi mekenine deıin)

Joldardy búgin, ıaǵnı 6 qańtar saǵat 07:30–da ashý josparlanǵan.

Táýlik boıy qosymsha aqparat alý úshin 1403 baılanys ortalyǵyna habarlasýǵa bolady.  

Osyǵan deıin Aqtóbede qatty jeldiń saldarynan birneshe aýylda jaryq óshkeni týraly jazdyq.