Aýa raıy: Respýblıkalyq avtojoldardaǵy ahýal qalaı?
ASTANA. KAZINFORM — Aýa raıynyń qolaısyzdyǵyna baılanysty elimizdiń birqatar óńirinde respýblıkalyq jáne oblystyq mańyzy bar jol ýchaskeleri jabyldy. Qutqarýshylar men polıtseıler trassada qalyp qoıǵan jolaýshylarǵa kómek kórsetip jatyr, dep habarlaıdy Kazinform agenttigi.
Aldyn ala eskertý berilip jatqanyna qaramastan, adamdar burqasynda jolǵa shyǵyp ketip, qar qursaýynda qalyp, kómek kútýde.
Máselen, ShQO Polıtsııa departamenti baspasóz qyzmetiniń habarlaýynsha, «Óskemen — Samara» avtojolynda 30-dan astam kólik jolda qalǵan. Olarǵa tártip saqshylary kómekke kelip, qaýipsiz aýmaqqa deıin jetkizdi.
Pavlodar oblysynda da qutqarýshylar qar qursaýynan tórt adamdy alyp shyqty. Onda 112 pýltine «Jasybaı» demalys aımaǵynan 10 shaqyrym jerde jeńil kólik jolaýshylarymen birge qarǵa batyp qalǵany jaıly habar túsken.
— Oqıǵa ornyna barǵan qutqarýshylar ishinde 4 adamy bar kólikti qardan shyǵaryp, tazartylǵan jol ýchaskesine súırep jetkizdi. Olarǵa medıtsınalyq kómek qajet bolmady, — dep atap ótti oblystyq TJD baspasóz qyzmeti.
Aqmola oblysy TJD baspasóz qyzmetiniń málimetinshe, Úshsart aýylynyń mańynda qar qursaýynda qalǵan eki adam qutqaryldy. Jolaýshylar otyrǵan jeńil avtokólik qalyń qarda turyp qalǵan.
— Oqıǵa ornyna kelgen qutqarýshylar jolaýshylardy jaqyn mańdaǵy eldi mekenge evakýatsııalady. Olarǵa medıtsınalyq kómek qajet bolǵan joq, — dep málimdedi óńirlik TJD resmı ókili Ersaıyn Qoıshybaev.
«QazAvtoJol» UK» Aq baspasóz qyzmetiniń málimetinshe qazirgi sátte kelesi respýblıkalyq avtojoldarda kóliktiń barlyq túriniń qozǵalysyna shekteý qoıyldy:
Aqmola oblysy:
— «Astana-Ereımentaý-Shiderti» avtojolynyń 16-200 shaqyrym aralyǵy (Astana qalasy-Pavlodar oblysy shekarasy);
— «Astana-Petropavlovsk» avtojolynyń 18-232 shaqyrym aralyǵyndaǵy ýchaskecinde (Astana qalasy — Şýchınsk qalasy);
— «Astana-Qabanbaı batyr-Nura-Temirtaý» avtojolynyń 35-51 shaqyrym aralyǵy (Qabanbaı Batyr aýyly — Qaraǵandy oblysy shekarasy);
Pavlodar oblysy:
«Astana-Ereımentaý-Shiderti» avtojolynyń 200-254 shaqyrym aralyǵy (Aqmola oblysy shekarasy-Shiderti aýyly);
Qaraǵandy oblysy:
— «Astana-Qabanbaı batyr-Nura-Temirtaý» avtojolynyń 51-266 shaqyrym aralyǵy (Aqmola oblysy shekarasy-Temirtaý qalasy).
Sondaı-aq saǵat 14:00–da kelesi respýblıkalyq mańyzy bar avtojoldarda kóliktiń barlyq túri úshin qozǵalys ashyldy:
Aqmola oblysy:
— «Qostanaı-Áýlıekól-Surǵan» avtojolynyń 232-260 shaqyrym aralyǵyndaǵy ýchaskecinde (Qostanaı oblysy shekarasy — Surǵan aýyly);
— «Jaqsy-Esil-Buzylyq» avtojolynyń 0-82 shaqyrym aralyǵyndaǵy ýchaskecinde (Jaqsy aýyly — Buzylyq aýyly);
— «Jezqazǵan-Arqalyq-Petropavlovsk» avtojolynyń 537-595 shaqyrym aralyǵyndaǵy ýchaskecinde (Buzylyq aýyly — SQO shekarasy);
— «Astana-Atbasar-Jaqsy-Rýzaevka-Sarykól-Qostanaı-RF shekarasy» avtojolynyń 917-1003 shaqyrym aralyǵyndaǵy ýchaskecinde (Jaqsy aýyly — Atbasar qalasy);
— «Kókshetaý-Atbasar» avtojolynyń 120-184 shaqyrym aralyǵyndaǵy ýchaskecinde (Atbasar qalasy — Maksımovka aýyly);
Soltústik Qazaqstan oblysy:
— «Jezqazǵan-Arqalyq-Petropavlovsk» avtojolynyń 595-671 shaqyrym aralyǵyndaǵy ýchaskecinde (Aqmola oblysy shekarasy — Toqsan bı aýyly);
Qostanaı oblysy:
— «Qostanaı-Áýlıekól-Surǵan» avtojolynyń 232-260 shaqyrym aralyǵyndaǵy ýchaskecinde (Oktıabrskoe aýyly — Aqmola oblysy shekarasy — Surǵan aýyly).
Sondaı-aq 14:10-da Qaraǵandy oblysynda «Astana-Qaraǵandy-Almaty» avtojolynyń 1426-1457 shaqyrym aralyǵyndaǵy ýchaskecinde (PVP Temirtaý — Qaraǵandy qalasy) kóliktin barlyq túri úshin qozǵalys ashylady.
14:30-da kelesi Aqmola oblysynda «Astana-Petropavlovsk» avtojolynyń 18-232 shaqyrym aralyǵyndaǵy ýchaskecinde (Astana qalasy — Şýchınsk qalasy) respýblıkalyq mańyzy bar avtojoldarda kóliktiń barlyq túri úshin qozǵalys ashylady.
Buǵan deıin birqatar óńirde joldardyń jabylǵanyn jazǵan edik.