Kún kúrt qubylady: Sınoptıkter qazaqstandyqtarǵa eskertý jasady
ASTANA. KAZINFORM — Qazaqstandyqtarǵa naızaǵaı, nóser jańbyr jáne órt qaýpi týraly eskertý jasaldy. Bul týraly «Qazgıdromet» RMK baspasóz qyzmeti málimdedi.
Sınoptıkterdiń boljamynsha, birqatar oblysta naızaǵaı oınap, nóser jańbyr jaýady, burshaq túsip, ekpindi jel soǵady jáne shańdy daýyl kóteriledi. Al ońtústik jáne shyǵys óńirlerde aýa temperatýrasy keı jerlerde +38 gradýsqa deıin kóteriledi. Sonymen qatar birneshe oblysta joǵary jáne tótenshe órt qaýpi saqtalady.
Sınoptıkterdiń málimetinshe, 3 maýsymda eldiń birneshe óńirinde kúrdeli kún raıy qalyptasady.
Túrkistan oblysynda túnde, sondaı-aq tańerteń jáne kúndiz taýly jáne taý bókterindegi aýdandarda qysqa merzimdi jańbyr jaýyp, naızaǵaı kútiledi. Soltústik-batystan soǵatyn jeldiń jyldamdyǵy keı jerlerde sekýndyna 15–20 metrge jetedi. Osyndaı aýa raıy Shymkent qalasynda da boljanyp otyr.
Jetisý oblysynyń taýly aýdandarynda qysqa merzimdi jańbyr jaýyp, keı jerlerde naızaǵaı bolady. Kúndiz oblystyń shyǵysy men batysynda jeldiń kúsheıýi sekýndyna 15–20 metrge deıin jetedi. Aýa temperatýrasy +35...+38 gradýsqa deıin kóterilýi múmkin. Oblystyń basym bóliginde joǵary, al keı jerlerinde tótenshe órt qaýpi saqtalady.
Atyraý oblysynda túnde jańbyr jaýyp, naızaǵaı oınaıdy. Oblystyń shyǵysynda qatty jańbyr, burshaq jáne daýyl bolýy múmkin. Kúndiz jaýyn-shashyndy aýa raıy oblystyń soltústiginde, shyǵysynda jáne ońtústiginde jalǵasady.
Mańǵystaý oblysynda jańbyr, naızaǵaı jáne burshaq kútiledi. Jel ekpini keı jerlerde sekýndyna 23 metrge deıin jetedi. Óńirdiń ortalyq bóliginde joǵary órt qaýpi saqtalady.
Aqtóbe oblysynda da qolaısyz aýa raıy kútiledi. Naızaǵaı, qatty jańbyr, burshaq jáne daýyl boljanyp otyr. Jeldiń jyldamdyǵy keı aýdandarda sekýndyna 25 metrge deıin jetýi múmkin. Birqatar aýdanda tótenshe órt qaýpi saqtalady.
Shyǵys Qazaqstan oblysynda 6 maýsymǵa deıin kúndiz aýa temperatýrasy +30...+35 gradýsqa deıin kóterilip, aptap ystyq bolady. 3 maýsymda óńirdiń soltústigi men shyǵysynda azdaǵan jańbyr jaýyp, naızaǵaı bolýy múmkin.
Almaty oblysynda túnde taýly jáne taý bókterindegi aýdandarda, al kúndiz soltústik, ońtústik jáne taýly aımaqtarda jańbyr jaýyp, naızaǵaı kútiledi. Keı jerlerde qatty jaýyn-shashyn túsip, jeldiń jyldamdyǵy sekýndyna 25 metrge deıin kúsheıedi. Oblystyń soltústiginde aýa temperatýrasy +36 gradýsqa jetedi. Soltústik bólikte joǵary jáne tótenshe órt qaýpi saqtalady.
Almaty qalasynda kúndiz jańbyr jaýyp, naızaǵaı oınaıdy. Jel ekpini sekýndyna 15–18 metrge jetedi. Іle Alataýynyń taýly aýdandarynda qatty jańbyr men naızaǵaı kútiledi.
Abaı oblysynda da 6 maýsymǵa deıin +35 gradýsqa deıingi aptap ystyq saqtalady. Budan bólek, óńirde naızaǵaı bolyp, jeldiń jyldamdyǵy sekýndyna 20 metrge deıin kúsheıedi. Keı aýmaqtarda tótenshe órt qaýpi saqtalady.
3 maýsymda Qostanaı, Batys Qazaqstan, Qaraǵandy, Soltústik Qazaqstan jáne Ulytaý oblystarynda da jańbyr jaýyp, naızaǵaı bolady. Keı aýdandarda burshaq túsip, daýyl soǵyp, jeldiń jyldamdyǵy sekýndyna 23 metrge deıin kúsheıýi múmkin.
Qyzylorda oblysynda sınoptıkter naızaǵaı, daýyldy jel jáne shańdy daýyl týraly eskertti. Óńirdiń basym bóliginde tótenshe órt qaýpi saqtalady.
Pavlodar oblysynyń batysynda, ońtústiginde jáne shyǵysynda joǵary órt qaýpi saqtalyp otyr.
Aqmola oblysynda jeldiń jyldamdyǵy sekýndyna 15–20 metrge deıin kúsheıedi. Oblystyń shyǵysynda joǵary órt qaýpi saqtalady.
Jambyl oblysynyń soltústiginde, ońtústiginde, shyǵysynda jáne taýly aýdandarynda qysqa merzimdi jańbyr jaýyp, naızaǵaı kútiledi. Jel ekpini keı jerlerde sekýndyna 23 metrge jetedi. Óńirdiń birqatar aýdanynda joǵary órt qaýpi saqtalady.
Sınoptıkter turǵyndarǵa qatty jel, naızaǵaı jáne aptap ystyq kezinde qaýipsizdik sharalaryn saqtaýǵa, sondaı-aq tabıǵı órt shyǵý qaýpi joǵary aýmaqtarda ot jaqpaýǵa keńes beredi.
Budan buryn habarlanǵandaı, Almaty qutqarýshylary aýa raıyna baılanysty eskertý jasady.
