Atyshýly vıdeo: Kóliginen nasha tabylǵan jigit aqtalyp shyqty
Esterińizge sala keteıik, osydan birshama ýaqyt buryn jas jigittiń kelinshegi Elvıra Mahanova áleýmettik jelilerdi dúr silkindirip, tártip saqshylarynyń áreketin áshkereleıtin vıdeo júktegen bolatyn.
Beınematerıalda quqyq qorǵaýshy toqtap turǵan kóliktiń artqy esigin ashyp, áldeneni salǵanyn baıqaýǵa bolady. Osydan soń, Rýslan Barahatovtyń kóliginen esirtki zaty tabylǵan.
«Tártip saqshylary mekteptiń kamerasyna túsip qalǵan. Polıtseılerdiń ózderi kameranyń jumys jasap turǵanyn bilmegen. Bilgennen keıin beınejazbany qoldy qylýǵa áreket jasapty. Biraq, kózdegen maqsattaryna jetken joq. Áleýmettik jelige salyp, kópshiliktiń nazaryna usyndyq. Qoǵamdyq pikir týǵannan keıin, kúıeýim aqtaldy. Búginde qylmystyq is qysqartyldy. Aıyppul alańyna qoıylǵan kóligimizdi shyǵaryp aldyq. Іske baılanysty shyǵarylǵan qaýly qolymyzda bar», - deıdi Elvıra Mahanova.
Atalmysh iske baılanysty Qyzylorda oblystyq ishki ister departamenti aqparattyń tolyq jarııalanbaıtynyn málim etti.
«Qazaqstan Respýblıkasy QPK-niń 201-babynyń 1-bóliginiń talabyna sákes, sotqa deıingi tergep-tekserý derekteri jarııa etilmeýge tıis. Eger tergep-tekserý múddelerine qaıshy kelmese jáne basqa tulǵalardyń quqyqtary men zańdy múddelerin buzýǵa baılanysty bolmasa tek prokýrordyń ruqsatymen ǵana belgili bir kólemde ǵana aqparat joldaýǵa bolatynyn habarlaımyz», - dep málimdedi departamenttiń baspasóz qyzmeti.
Jas kelinshektiń aıtýynsha, zańsyz áreketke barǵan tártip saqshylaryn arnaıy prokýratýra mamandary tergep jatyr eken. Alaıda, bul turǵyda naqty málimet alý múmkin bolmady.
Aınur Tóleshova