Atyshýly qylmysty ashqan qyzylordalyq tergeýshi
QYZYLORDA. QazAqparat - Qyzylordada byltyr burynǵy kúıeýin óltirý maqsatynda «kıller» jaldaǵan áıelge qatysty qylmystyq oqıǵa jergilikti jurtshylyqty dúr silkindirgen edi. Bul oraıda qylmystyq is ashýǵa tergeýshi Narıman Ábilákim úlken eńbek sińirdi, dep habarlaıdy QazAqparat tilshisi.
Bul oqıǵa ótken jyldyń shilde aıynda boldy. Áıel adam burynǵy kúıeýin óltirý maqsatynda Túrkistan oblysy turǵynyna tapsyrys beredi. Ol adam buryn sotty bolǵan, burynǵy kúıeýiniń tsehynda jumys istegen. Áıel oǵan qyzmeti úshin 20 myń AQSh dollaryn beretinin aıtady.
Kásipker kúıeýi áıelimen ajyrasqanmen otbasyna qol ushyn sozýdy umytpaıdy. Baspana, nan jáne tigin tsehy qurylǵysyn satyp alyp beredi. Oǵan qosa avtokran men jeńil avtokóligin áıeliniń atyna aýdaryp bergen. Otbasylyq ómirinde erli-zaıyptylar 4 bala ómirge alyp kelgen.
Túrkistan oblysynyń turǵyny áıeldiń qylmystyq pıǵylyn áshkereleýdi durys kóredi. Osy maqsatta oblystyq polıtsııa departamentine aryzdanǵan.
Dereý sotqa deıingi tergep-tekserý bastaldy. Áıelden tapsyrys alǵan azamat arnaıy kisi óltirýshi retinde belgilendi. Aldyn ala jasalǵan jospar boıynsha «kıller» jábirlenýshini «óltirgeni» jaıly oqıǵany dáleldeý úshin ımıtatsııa jasaıdy. Jábirlenýshi óltirgen áreketin kórsetedi. Jábirlenýshiniń ústine qan jaǵyp, pyshaq pen oǵan tıesili basqa da zattaryn uıaly telefonǵa túsiredi. Bul fotosýretti tapsyrys bergen áıelge jibergen.
Atalǵan isti tergep-tekserý sharasyn júrgizgen Narıman Ábilákim ony ádil júrgizýge barynsha kóńil bóldi. Osy oraıda oqıǵanyń árbir bóligin nazardan tys qaldyrǵan joq.
Tapsyrys bergen áıel qylmystyq pıǵyly tolyǵymen «oryndalǵanyna» kózin jetkizedi. Sodan keıin qaltasynan alǵan 10 myń teńgeni «kıller» qyzmetin atqarǵan adamǵa jolaqy retinde beredi. Al burynǵy kúıeýiniń atyna tirkelgen múlikter balalaryna mura bolyp ótkennen keıin eńbekaqysyn beretinin aıtady. Basty sot talqylaýynda burynǵy kúıeýi sottalýshyǵa barynsha jeńil jaza berýin surady.
Qyzylorda oblysynyń mamandandyrylǵan aýdanaralyq sotynyń úkimimen sottalýshy QR Qylmystyq kodeksiniń 24-babynyń 1-bóligi, 28-babynyń 4-bóligi, 99-babynyń 2-bóliginiń 8)-tarmaǵymen kináli dep tanyldy. Ol 7 jyl 6 aıǵa bas bostandyǵynan aıyryldy.
