Atyshýly alaıaq Pavel Krymov almatylyq kelinshektiń 23 myń dollaryn alyp ketken
ALMATY. QazAqparat - Almaty polıtsııasyna alaıaq Pavel Krymovtyń áreketinen zardap shekken taǵy bir kelinshek júgindi, dep habarlaıdy QazAqparat tilshisi.
Qalalyq ІІD baspasóz qyzmetiniń habarlaýynsha, 42 jastaǵy Krymov onyń 23 myń AQSh dollaryn alyp ketken.
Atalǵan derek QR QK 190-babynyń 4-tarmaǵy boıynsha sotqa deıingi biryńǵaı tergeý reestrine tirkeldi.
«Tergeý materıaldaryna sáıkes bıyl naýryz aıynda Krymov almatylyq azamatshany aqsha tabý týraly trenıngke shaqyrǵan. Kezdesý kezinde Krymov ózin «Questra World & Atlantik Global» kompanııasynyń ókili retinde tanystyryp, bankrotqa ushyraǵan kompanııanyń aktsııasyn satyp alyp, kóterýmen aınalysatynyn aıtqan. 1 aıdan soń taǵy bir kezdesý kezinde Krymov Pavel «Questra World & Atlantik Global» kompanııasynyń Almatydaǵy ofısin ashatynyn, oǵan dırektor bolýdy usynady. Kezdesýden soń kelinshek Krymovqa 23 myń AQSh dollaryn ustatyp jibergen. Sodan beri ol Krymovpen habarlasa almaǵan», - dedi qalalyq ІІD tergeý basqarmasynda.
Aıta ketý kerek, Almaty polıtsııasyna Krymovtyń atyna buryn da aryz túsken bolatyn.
«Іs materıaldaryna sáıkes, 2014 jyldyń sońynda P.Krymov ınternet arqyly almatylyq er adammen tanysady. Oǵan óziniń bankrotqa ushyraǵaly turǵan kompanııalarǵa qarjy salyp, qutqaryp qalatynyn aıtqan. Osylaısha ınvestıtsııa salý arqyly tek qana kompanııany qutqaryp qoımaı, jaqsy tabys tabatynyn aıtyp sendirgen. Almatylyq jigit oǵan 3 myń AQSh dollaryn beredi. Alaıda, alǵash ret Krymov onyń aqshasyn 7 myń 200 dollar qyp qaıtaryp beredi. Osylaısha ol álgi adamnyń senimine kire bastaıdy. Biraz ýaqyt ótken soń Krymov álgi jigitpen taǵy kezdesip, áli de ınvestıtsııamen aınalysyp júrgenin aıtqan. Endi oǵan «Kvestra World» pen «Atlantik Global» kompanııalaryna aqsha salýǵa keńes bergen. Sózin dáleldi etý úshin Krymov eki kompanııanyń foto, vıdeosyn, prezentatsııasyn kórsetken. Sóıtip, ol kompanııanyń 65 myń evro turatyn «Indıgo» aktsııalar paketin satyp alýǵa úgittegen. Krymov er adamǵa atalǵan qarjy aıyna 322 protsent kóleminde tabys ákeledi dep sendirgen», - dedi ІІD resmı ókili Saltanat Ázirbek.
Onyń aıtýynsha, alaıaqtyń aıtqandaryna sengen er adam bıyl sáýirde oǵan 75 myń AQSh dollaryn, ıaǵnı 24 mln teńgesin ustatyp jibergen. Sodan beri Krymov habarsyz ketken. Tek biraz ýaqyt ótkende ǵana aldanǵanyn sezgen almatylyq jigit polıtsııaǵa aryzdandy. Atalǵan derek QR QK 190-babynyń 4-bólimimen sotqa deıingi tergeý isi reestrine tirkeldi. Almaty polıtsııasy Krymovtyń áreketinen japa shekken adamdar bolsa, 8 (727) 254-42-62, 8 (727) 254-43-79, 8-708-383-38-56, 8-778-262-82-48 telefondaryna habarlasýdy suraıdy.
