Atys qarýymen shabýyl jasaǵan qylmysker qolǵa tústi
ASTANA. 15 naýryz. QazAqparat. /Aınur Kenebaeva/ - Astana qalasynyń tártip saqshylary atys qarýymen shabýyl jasap, jábirlenýshi azamattyń ólimine sebep bolǵan qylmyskerdi qolǵa túsirdi.
Bul týraly búgin Astana qalasy ІІD-de ótken baspasóz máslıhatynda málim boldy.
ІІD málimetterine sáıkes, qylmysker «Opel» markaly avtokólik júrgizýshisin «Sýbarý» markaly avtokóligimen jol jıegine yǵystyra májbúrlep toqtatyp, 3 ret oq atyp, jábirlenýshini jaraqtattaǵan jáne qylmystyq oqıǵa ústinen iz jasyryp ketken.
Oqıǵa Respýblıka dańǵylyndaǵy «Shambala» dámhanasy aýmaǵynda 2010 jyldyń 3 qyrkúıeginde túngi saǵat eki shamasynda oryn alǵan.
«Atys qarýynan bolǵan baýyrdyń zaqymdaný jaraqatymen jáne qolyna oq tıgen, ekinshi dárejeli gemorragııalyq esten taný» dıagnozymen № 1 qalalyq aýrýhanaǵa jetkizilgen 1984 jylǵy azamat aýyr jaraqat saldarynan es jımastan qaıtys bolǵan.
ІІD Tergeý basqarmasy qyzmetkerleriniń izdestirý sharalary nátıjesinde buryn birneshe ret sottalǵan atalmysh qylmysqa jaýapty 33 jasar azamat ustaldy. Tekseris barysynda kúdiktiden «TT» markaly áskerı tapansha men 9 oǵy bar oqshantaı tárkilendi.
Qylmyskerdiń ústinen QR Qylmystyq kodeksiniń 96-baby 1-bólimi, 251-baby, 1-bólimi boıynsha qylmystyq is qozǵalyp, azamat tergeý ızolıatoryna toǵytyldy.
