Atyraýlyqtarǵa jeke úı salýǵa 1 myńǵa jýyq jer telimi beriledi

ATYRAÝ. QazAqparat - Atyraý qalasynyń turǵyndaryna jeke úı salýǵa 1 myńǵa jýyq jer telimi beriledi. Buǵan qosa 3 myń jer teliminiń jobalyq-smetalyq qujattamasy ázirlenip jatyr, dep habarlaıdy QazAqparat qala ákimdiginiń baspasóz qyzmetine silteme jasap.

Búgin Atyraý qalasynyń ákimi Alımuhammed Quttumuratuly turǵyndarmen eseptik kezdesý ótkizdi. Qala basshysy 2018 jylǵy áleýmettik-ekonomıkalyq damý qortyndylary týraly aıtty.

Oblys ortalyǵy men oǵan irgeles ornalasqan eldimekenderdiń turǵyndaryn mazalaıtyn suraqtyń biri - jeke úı salý úshin jer telimin alý. Qazir jer kezeginde 85 myńnan astam adam tur.

2018 jyly jergilikti bılik 1999-2004 jyldary kezekke turǵan azamattarǵa Zaroslyı eldimekeninen 870 jer telimin berdi.

«Bıyl osy eldimekennen myńǵa jýyq jer telimin berýdi josparlap otyrmyz. Sonymen qatar, Erkinqala-3 aýylynda 3 myń jer teliminiń jobasy jasaqtalýda. Zańǵa sáıkes jer ınjenerlik kommýnıkatsııalar tolyq júrgizilgennen keıin ǵana beriledi», - dedi Alımuhammed Quttumuratuly.

Aıta keteıik, 2018 jyly Atyraý qalalyq ákimdigi kommertsııalyq maqsattaǵy 66 jer telimin satý boıynsha úsh aýktsıon ótkizdi. Nátıjesinde jalpy somasy 19,3 mlrd teńgeniń 34 jer telimi satyldy.

«Qalǵan 32 jer telimin satý boıynsha aýktsıon 22 aqpanda ótedi», - dep málim etti Atyraý qalasynyń ákimi.