Atyraýlyqtarǵa 23:00-den keıin úıden shyǵýǵa tyıym salyndy

ATYRAÝ. QazAqparat - Atyraý oblysynyń aýmaǵynda 5 shilde saǵat 00:00-den bastap 19 shilde saǵat 00:00-ge deıin shekteý sharalary engizildi, dep habarlaıdy Atyraý oblystyq kommýnıkatsııalar qyzmeti.

Bul týraly Óńirlik kommýnıkatsııalar qyzmetiniń baspasóz ortalyǵynda ótken onlaın brıfıngte Atyraý oblysynyń taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Súleımen Áýbákirov málimdedi.

- Oblystyń bas memlekettik sanıtar dárigeriniń qaýlysyna sáıkes, turǵyndardyń qozǵalysyna shekteý qoıylady. Alaıda, azamattardyń turǵylyqty jerinen jumys ornyna barýyna jáne keri qaıtýyna tyıym salynbaıdy. Tek bul jaǵdaıda olardyń jumys ornynan berilgen anyqtama nemese qyzmettik kýáligi ózderimen birge bolýy kerek. Sondaı-aq, azyq-túlik ónimderin, qajetti taýarlardy, dári-dármekti turǵylyqty jerine jaqyn ornalasqan dúkender men dárihanalardan satyp alýǵa, tótenshe jaǵdaı týyndaǵan kezde medıtsınalyq mekemelerge barýǵa ruqsat etiledi, - dedi Súleımen Áýbákirov.

Aıta keteıik, turǵyndardyń qozǵalysyna keshki saǵat 23:00-den tańǵy saǵat 06:00-ge deıin tyıym salynady.