Atyraýlyqtardy 30 mln teńge shyǵynǵa batyrǵan týrıstik fırma dırektory 5 jylǵa sottaldy
Atyraý qalasynyń №2 sotynyń aqparatyna sáıkes, týrıstik fırma dırektory N.M.-ǵa qatysty qylmystyq is qaraldy. Kúdiktige QR Qylmystyq kodeksiniń 190-baby, 3-bóliginiń 4) tarmaǵy boıynsha birneshe ret jasalǵan alaıaqtyq deregimen qylmystyq is qozǵalǵan.
«Sottalýshy N.M. «I» JShS-niń jalǵyz quryltaıshysy jáne dırektory bola otyryp, týrıstik qyzmetter keshenin kórsetkeni úshin jábirlenýshilermen sharttar jasasqan. Klıentterden bastapqy 30% jáne túpkilikti 100% tólem qabyldap, jábirlenýshilerdi aldaý jáne senimderin teris paıdalaný jolymen, týrıstik joldamalardy satyp alý úshin týrıstik operatorlarǵa jábirlenýshilerdiń aqshasyn aýdarmaı, olardyń qarajatyn jeke qajettiligine jumsaǵan. Nátıjesinde jábirlenýshiler týrıstik joldamalaryn ala almaý sebebinen demalysqa shyǵa almaǵan. Barlyq epızod boıynsha 31 jábirlenýshige 30 mln 731 syń 800 teńge kóleminde múliktik zalal keltirilgen», - dep habarlady №2 sottyń baspasóz qyzmeti.
Sot otyrysynda sottalýshy N.M. aıyppen kelispegen. Ol jábirlenýshilerdiń týrıstik joldama alý úshin tólegen qarajatyn alaıaqtyq jolmen jymqyrmaǵanyn, ony jumysshylarǵa jalaqy, bonýstar tóleýge, kompanııanyń shyǵyndaryn jabýǵa, ofısti jalǵa alýǵa, kommýnaldyq tólemder tóleýge jáne bıznesti jandandyrý úshin alynǵan nesıelerdi tóleýge jumsaǵanyn kórsetken.
Alaıda sot otyrysynda sottalýshynyń kinási jábirlenýshilerdiń, kýágerlerdiń aıǵaqtarymen, ekinshi deńgeıdegi bankterdiń úzindilerimen rastalǵan. Jábirlenýshiler men «I» JShS arasynda týrıstik qyzmetter kórsetýge sharttar jasalyp, jábirlenýshilerdiń týrıstik joldama alýǵa tólegen aqsha qarajaty qabyldanyp, tolyqtaı seriktestiktiń esepshotyna aýdarylǵan. Al bul qarajattdy odan ári paıdalanýǵa tek N.M. quqyly bolǵan. Biraq N.M. bul qarajattardy jábirlenýshilerdiń joldamalary úshin týrıstik operatorlarǵa aýdarmaǵany dáleldengen.
Prokýror N.M.-ǵa 4 jyl 8 aı merzimge bas bostandyǵynan aıyrý jazasyn taǵaıyndaýdy surady. Jábirlenýshiler N.M.-dan múliktik zalaldy óndirip, ony zań boıynsha qatań jazalaýdy usynǵan. Qorǵaýshy taraby sottalýshy N.M.-nyń áreketin QR Qylmystyq kodekstiń 190 babynan 195-babyna (jymqyrý belgileri bolmaǵan kezde aldaý nemese senimdi teris paıdalaný jolymen múliktik zalal keltirý) dárejeleýdi surady.
«Sot N.M.-ny QR Qylmystyq kodekstiń 190-baby 3-bóliginiń 4) tarmaǵymen kináli dep tanyp, oǵan 5 jyl merzimge bas bostandyǵynan aıyrý jazasyn taǵaıyndady. Jaza óteý orny retinde qylmystyq-atqarý júıesiniń qaýipsizdigi ortasha mekemesi belgilendi. Jábirlenýshilerdiń azamattyq talaby tolyqtaı qanaǵattandyryldy», -dep málim etti sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraý soty úsh adamdy óltirip, ómir boıyna sottalǵan jigittiń úkimin ózgerissiz qaldyrǵan edi.
