Atyraýlyqtar Jylyoı aýdanynyń 90 jyldyǵyn dýmandatyp atap ótpek
ATYRAÝ. QazAqparat - Atyraý oblysynda Jylyoı aýdanynyń 90 jyldyǵyn atap ótý sharalary bastaldy, dep habarlaıdy QazAqparat.
Mereıtoıdyń «Kıeli meken - Keń Jylyoı» atty merekelik baǵdarlamasynda birqatar mádenı sharalar bar. Mádenı sharalardyń ishinde Júrsin Erman basqaratyn aqyndar aıtysynda Qazaqstannyń aımaqtarynan kelgen sýyryp-salma 14 aqyn ózara baq synamaq.
29 qyrkúıek kúni saǵat 10-00-de Ortalyq alańda «Sarmad» etnofolklorlyq ansambliniń jáne Atyraý oblystyq fılarmonııasy men Jylyoı aýdany ártisteriniń qatysýymen kontsert ótedi.
Saǵat 15-00-de «Báıge» alańynda ulttyq at sporty oıyndary uıymdastyrylyp, jeńimpazdar aqshalaı utystarǵa ıe bolady. Aıta keteıik, jarystarǵa qatysýǵa nıet bildirgenderdiń barlyǵy arnaıy tirkeý sharasynan ótýleri kerek.
Sharany uıymdastyrýshylar baǵdarlama aıasyndaǵy jarystardyń jeńimpazdary men júldegerlerine aqshalaı jáne qundy syılyqtaryn daıyndap otyr. Aıtalyq onda qazaq kúresinen jeńip shyqqan 1 oryn ıegeri 500 myń teńge alady. Osy sport túrinen ekinshi orynnan kóringen azamat 300 myń teńge, al úshinshi oryn alǵan adam 100 myń teńge alady. Kir tasyn kóterýden 1-orynǵa 50 myń, 2-shi orynǵa 30 myń, 3-shi orynǵa 20 myń teńge tigilgen.
Qol kúrestirý saıysynyń jeńimpazyna da 50 myń, ekinshi oryn alǵan adamǵa 30 myń, 3-shi orynǵa 20 myń teńge beriledi.
Al «Alaman báıge» jarysynyń jeńimpazy jol talǵamaıtyn «Nissan Terrano» markili kóligin alady. Ekinshi oryndy alǵan adam mototsıklge ıe bolady. Úshinshi orynǵa 300 myń teńge taǵaıyndalǵan. «Top báıgeniń» 1-inshi ornyna «Nıva» markili kóligi, 2-inshi ornyna 500 myń teńge, 3-inshi ornyna 200 myń teńge tigilgen.
Saǵat 18-00-de mereke Qulsary qalasynyń ortalyq stadıonynda uıymdastyrylatyn úlken gala-kontsertke ulasady. Onda Móldir Áýelbekova, Ómirqul Aınııazov, Qýandyq Raqym, Ǵazızhan Shekerbekov, Beıbit Kúshqalıev sııaqty qazaqstandyq estrada juldyzdary men «Nazar» toby óner kórsetpek.
