Atyraýlyqtar sýdyń jaǵymsyz dámine shaǵymdandy

ATYRAÝ. QazAqparat - Atyraý qalasynyń turǵyndary keıingi kúnderi qaınatylǵan sýdan kermek dám shyǵatynyna shaǵymdanyp jatyr, dep habarlaıdy QazAqparat tilshisi.

Jeli qoldanýshylary shıki sýdyń turmysqa paıdalanýǵa jaramsyz ekenin jarysa jazýda. «Atyraý oblysy sý arnasy» kommýnaldyq memlekettik kásipornynyń baspasóz hatshysy Aleksandr Pastýhovtyń aıtýynsha, barlyq sý tazalaý qondyrǵylary qalypty jaǵdaıda jumys istep tur.

«Aýyz sý sapasy zerthanada turaqty túrde qadaǵalanady. Hımııalyq reagentter qajetti mólsherde ǵana qoldanylǵan. Tazalaý qondyrǵylarynan aqqan sýdyń quramy men sapasy sanıtarlyq talapqa tolyqtaı sáıkes keledi. Áıtse de, turǵyndardyń aryz-shaǵymy eskerýsiz qalmaıdy. Áleýmettik jelide kórsetilgen mekenjaılar boıynsha sý synamalary alynyp, tekseriletin bolady. Bul týraly jurtshylyqqa mindetti túrde habarlaıtyn bolamyz»- dedi Aleksandr Pastýhov.

Foto: poltavskaya.bezformata.com