Atyraýlyqtar Soltústik-Kaspıı jobasynyń 25 jyldyǵyn atap ótýde
Bul - Qazaqstandaǵy teńiz munaı-gaz ken oryndaryn ıgerýdiń alǵashqy iri jobasy. Merekeni atap ótý aıasynda Atyraýda «Qashaǵan Qazaqstannyń bolashaǵy úshin» ǵylymı-tájirıbelik konferentsııasy ótkizildi. NCOC basshylyǵy men konsortsıým ujymy men Qashaǵan ken ornyn alǵash ashqan ardagerlerdiń aldynda Atyraý oblysynyń ákimi Nurlan Noǵaev sóz sóıledi. Oblys ákimi jobanyń mańyzdylyǵyna toqtala otyryp, Memleket Basshysy Nursultan Nazarbaevtyń quttyqtaýyn oqydy.
«Bul joba Qazaqstannyń munaı-gaz salasy úshin eń iri jáne mańyzdy jobalardyń birine aınaldy. Táýelsizdiktiń alǵashqy jyldarynda jas memleketimiz úshin Kaspıı qaırańyndaǵy iri Qashaǵan ken ornyn ıgerý aıyryqsha oqıǵa boldy. Jobany iske asyrý Qazaqstanǵa sheteldik ınvestıtsııalardy, jańa tehnologııalardy, kúrdeli teńiz ken oryndaryn ıgerýdegi álemdik tájirıbeni tartýǵa múmkindik berdi. Bul - osy jobaǵa qatysqan barlyq azamattardyń úlken eńbegi. Bul jumys ári qaraı da elimizdiń ekonomıkasy men energetıkalyq qaýipsizdigi úshin paıda ákeledi dep senemin», - delingen Nursultan Nazarbaevtyń quttyqtaýynda.
Oblys ákimi Soltústik Kaspıı jobasy - búgingi kúni elimizdiń ekonomıkasyna aıtarlyqtaı yqpalyn tıgizip otyrǵan Qashaǵan jobasy ǵana emes ekenin atap ótti.
«Men búgingi ujymnyń aldyna qoıǵan mindetterdi tolyq oryndaıtynyna senemin. Az jumys atqarylǵan joq, alaıda alda da eńseretin jumystar kóp. «Nóldik tsıkl», qorshaǵan ortaǵa uqyppen qaraý, qaýipsizdik tehnıkasynyń máseleleri - bul jobanyń basynda turǵan ózekti mindetter jáne kúni búginge deıin ómirlik mańyzdy problemalar. Olardy sheshý úshin álemdik munaı salasynyń barlyq tájirıbesi men áleýetin paıdalaný qajet», - dep atap kórsetti Nurlan Noǵaev.
Qashaǵan jobasyn iske asyrý Atyraý jáne Mańǵystaý oblystarynyń aýmaǵynda júrgizilýde. Mańǵystaý oblysynyń ákimi Eraly Toǵjanov atap ótkendeı, konsortsıýmnyń iri áleýmettik jobalardy iske asyrýdaǵy úlesi aıtarlyqtaı.
«Bul - prezıdentimizdiń jobasy, ol elimizdiń, táýelsiz Qazaqstannyń damýyna qýatty serpin beredi. Men jaqynda Aqtaý qalasynda ótken Kaspıı mańy memleketteri basshylarynyń sammıtine belsene qatysqany úshin konsortsıým basshylyǵyna alǵys bildirgim keledi. Kaspıı teńiziniń quqyqtyq mártebesi naqty belgilenip, qol qoıyldy. Bul - tarıhı oqıǵa. Sammıtti ótkizýge sizdiń konsortsıýmnyń qosqan úlesi mol», - dedi Eraly Toǵjanov.
NCOC konsortsıýmynyń basqarýshy dırektory Brýno Jarden Kaspııdegi ken oryndaryn ıgerý jónindegi bolashaqtaǵy jobalar týraly aıtyp berdi. Jobanyń ekonomıkalyq mańyzyn aıtarlyqtaı arttyratyn perspektıvalyq ken oryndary bar. Jobanyń tarıhy men búgingi jetistikteri týraly qazaqstandyq munaıshy-geologtar qoǵamynyń prezıdenti Baltabek Qýandyqov, NCOC konsortsıýmynyń basqarýshy dırektory Jaqyp Marabaev jáne basqalar áńgimeledi.
Sonymen birge, konferentsııada sóz sóılegen QR Energetıka vıtse-mınıstri Maǵzom Myrzaǵalıev Kaspıı qaırańyndaǵy odan ári qaraıǵy yntymaqtastyqtyń perspektıvalaryn atap ótti. Jańa ken oryndaryn ashý ınvestıtsııa salýdy, jańa tehnologııa tartýdy jáne jańa jumys oryndaryn ashýdy talap etedi. Búgingi kúni konsortsıým shamamen 16 mln tonna munaı men kondensat, 5 mlrd tekshe metrden astam gaz óndirdi, 700 myń tonnadan astam kúkirt eksporttady. Bul - Qazaqstannyń teńiz jobalaryn damytýdyń bastamasy ǵana. 
Konferentsııa sońynda konsortsıýmnyń birqatar basshylary, jaýapty qyzmetkerler, joba ardagerleri «Qazaqstannyń munaı-gaz salasynyń eńbegi sińgen qyzmetkeri» tósbelgisimen, «Qazaqstannyń munaıgaz salasyn damytqany úshin» medalimen, gramotalarmen jáne alǵys hattarmen marapattaldy.
Sondaı-aq, 29 tamyzda Soltústik Kaspıı jobasynyń 25 jyldyǵyn toılaý «Qashaǵan daýysy» vokaldy oryndaýshylardyń mýzykalyq konkýrsymen jalǵasady. Іs-shara N.Jantórın atyndaǵy fılarmonııada ótedi. Sol kúni keshke Sultan Beıbarys atyndaǵy alańda Atyraý turǵyndary men qonaqtary úshin oıyn-saýyq baǵdarlamasy bastalady. Kórermenderdiń nazaryna sýret salýdan sheberlik synyptary, kóshe bı toptarynyń ónerleri usynylady. Sonymen qatar, «Beshıktash» FK fýtbol sheberligi boıynsha sheberlik synyptary ótedi.
