Atyraýlyqtar ShQO-ǵa gýmanıtarlyq kómek jınap jatyr
Aımaqtaǵy memlekettik qyzmetshiler de bastamaǵa ún qosyp, zardap shekkenderge qarjylaı kómek aýdarýǵa nıet bildirip otyr.
Oblystyq jastar saıasaty máseleleri jónindegi basqarma basshysy Rollan Quspannyń aıtýynsha, dúısenbi, 12 naýryz kúni Shyǵys Qazaqstan oblysynda sý tasqynynan zardap shekkenderge gýmanıtarlyq kómek jınaý úshin jastar resýrstyq ortalyǵy bazasynda shtab quryldy.
«Bul bastamany barlyq jastar uıymdary qyzý qoldady. Gýmanıtarlyq kómek 19 naýryzǵa deıin jınalady. Sodan keıin Shyǵys Qazaqstan oblysyna jóneltemiz. Bizdiń eriktilerimiz de sý tasqyny bolǵan jerlerge baryp, qoldarynan keletin kómekterin kórsetýge nıetti, - deıdi Rollan Quspan.
Sondaı-aq, Atyraý oblysy ákimi apparaty men basqarmalar sý tasqynynan zardap shekkenderge qarjylaı kómek jınap jatyr. Memlekettik qyzmetshilerdiń bir kúndik eńbekaqylary arnaıy esepshot ashylǵannan keıin sý tasqynynan zardap shekkenderdiń esepshottaryna aýdarylady.