Atyraýlyqtar senbilikte 52 tonna qoqys pen 4,3 tonna óli balyq jınady
ATYRAÝ. QazAqparat - Atyraýda ótken senbilikte ózen jaǵalaýynan 52 tonna qoqys, 4,3 tonna óli balyq jınaldy. Bul týraly Óńirlik kommýnıkatsııalar ortalyǵynan málim etti, dep habarlaıdy QazAqparat.
Ekologııalyq sharaǵa 2600-den astam qala men selolyq okrýgterdiń turǵyndary, memlekettik mekemelerdiń qyzmetkerleri, qoǵamdyq uıymdardyń ókilderi, stýdentter qatysty.
«Senbilikke qatysqandar qatary kóp boldy, 52 tonna qoqys jınaldy. Kelesi joly da barlyq turǵyndardy osy bastamany qoldaýǵa, jaǵalaýdy tazartýǵa qatysýǵa shaqyramyz», -dedi Azamattyq ortalyqtyń medıa bóliminiń meńgerýshisi Symbat Jandarbek.
Sonymen qatar, senbilik qortyndysy boıynsha 4,3 tonna óli balyq jınaldy, balyqtardyń salmaǵy eseptelip, qylmystyq is materıalyna tirkeldi.
2018 jyldyń 10 jeltoqsanynan bastap «Kazgıdromet» RMK Jaıyq ózenindegi sý jaǵdaıyna monıtorıng júrgizip keledi. Zerthanalyq synamalar lastanýdyń joǵary deńgeıin kórsetpegen. Qazir «Qazgıdromet» monıtorıng aıasynda shtattyq rejimde apta saıyn synama alyp otyr. Sý synamasyn Ekologııa departamenti men tutynýshylar quqyǵyn qorǵaý departamenti de júrgizýde.
Búginge deıin 200-den astam synama alyndy. Bul ózenniń jaǵdaıyna monıtorıng úshjaqty júrgizilip jatqanyn jáne ózen jaǵdaıy qalypty ekenin kórsetedi.
«Aıta ketý kerek, qyrylǵan balyqtardyń basym bóligi (102,862 tonna) jasandy túrde ósirilgen, ıaǵnı ózendegi bekire tuqymdas balyqtardyń tabıǵı popýlıatsııasyna qatysy joq. Jaıyqtaǵy balyq qorynyń tabıǵı popýlıatsııasyna jınalyp alynǵan jalpy salmaǵy 11,3 tonna chastık tuqymdas balyqtar jatady. Sonymen qatar, QR Energetıka mınıstrligi Atyraý oblystyq ákimdigimen birlesip turaqty túrde aımaqtyń ekologııalyq ahýalyn jaqsartý jónindegi keshendi jospardy daıyndaýda. Jaǵdaıǵa memlekettik organdarmen birge «Nur Otan» partııasynyń oblystyq fılıaly, Atyraý oblystyq ákimdigi monıtorıng júrgizip otyr. «Nur Otan» partııasynyń fılıalymen qatar ishki ister organdarynyń qyzmetkerleri, QR Aýyl sharýashylyǵy mınıstrligi veterınarlyq qadaǵalaý komıteti qyzmetkerleri saýda oryndaryndaǵy balyq satatyn núktelerge kún saıyn tekserý jumystaryn júrgizedi. Atyraý oblystyq ákimdigi Jaıyq ózenine ǵylymı zertteý júrgizýge 80 mln teńge bóldi», - delingen baspasóz habarlamasynda.
