Atyraýlyqtar Oralǵa qatynaıtyn jol jıegine 500 kóshet ekti
Atyraý turǵyndarymen birge kóshet egýge oblys ákimi Serik Shápkenov, oblystyq, qalalyq ákimdikterdiń qyzmetkerleri qatysty. Olar respýblıkalyq mańyzy bar «Atyraý-Oral» tas jolynyń boıyna qaraǵash, shaǵan men úıeńkiniń 500 kóshetin ekti.
Oblys ákimi shara aıasynda Sultan Beıbarys dańǵylyndaǵy kópqabatty úılerdiń turǵyndarymen kezdesti. Turǵyndar aýladaǵy qaýipsizdik úshin beınekameralar sanyn kóbeıtýdi, úılerdiń shatyryn jóndeýge yqpal etýdi surady. Keıin turǵyndar oblys ákimimen birge aýlaǵa 50 kóshet egýge qatysty.
Oblystyq tabıǵı resýrstar jáne tabıǵatty paıdalanýdy retteý basqarmasynyń basshysy Nurlan Jantoqovtyń málimetinshe eldi mekenderinde kógaldandyrý men jasyl aımaqtar qurýdyń 2021-2025 jyldarǵa arnalǵan óńirlik jospary bar. Sonyń aıasynda 275 gektar aýmaqqa 540 myń kóshet egiledi. Bıyl 54,7 ga jerge 111 042 kóshet josparlanǵan.
«Atyraý oblysynda ormandardy ósirý men molaıtýdyń keshendik josparyna sáıkes 5 jylda 2 803 gektar alqapq 7 mln kóshet egý josparǵa engizildi. Soǵan sáıkes 2023 jyly 573,5 gektar jerge 1 439 myń kóshetin egý josparlanǵan edi. Qazir kóshet egý jumystary júrgizilip jatyr», -dedi Nurlan Jantoqov.
«Kaspııdormostostroı» JShS memleket-jekemenshik áriptestik jobasymen Atyraý qalasynda 5 jyl ishinde 25 myń kóshet egýi qajet. Bul seriktestik 2019 jyldan beri jyl saıyn Atyraý qalasynyń aýmaǵynda 5 myń kóshet egip jatyr. Bul seriktestik taldardy sýarý, aram shópten tazartý jumystaryn júrgizedi.
Eske sala ketelik, budan buryn Atyraý oblysynda bıyl 1,4 mln kóshet egiletinin habarlaǵan edik.