Atyraýlyqtar ónerine tánti bolǵan Parıj turǵyndary tamsana qol soqty
Kontsert Frantsııadaǵy Qazaqstan elshiliginiń qoldaýymen «Rýhanı jańǵyrý» baǵdarlamasy aıasynda uıymdastyrylǵan. Uly dala mýzykasyn tyńdaýǵa bes júzden asa adam jınaldy.
Frantsııadaǵy Qazaqstan elshisi Jan Galıevtiń aıtýynsha, Elbasy Nursultan Nazarbaevtyń «Rýhanı jańǵyrý» baǵdarlamasy aıasynda ótip jatqan atyraýlyq ártisterdiń gastroldik sapary Qazaqstan men Frantsııa arasyndaǵy mádenı baılanysty nyǵaıta túsedi. Parıjdegi kórermen qaýym Qurmanǵazy, Dına, Yqylas, Túrkesh, Nurǵısa Tilendıev, Latıf Hamıdı, Evgenıı Brýsılovskıı syndy daryndardyń shyǵarmalaryna tamsanyp, tik turyp qoshemet kórsetti.
«Ulttyq aspaptar orkestriniń kontserti 28 mamyr kúni Parıjdegi Gavoda klassıkalyq kontserttik zalynda ótti. 53 ártisten quralǵan orkestr sheteldik tyńdarmanǵa «Shýaqty ólkeniń shattyǵy» baǵdarlamasyn usyndy. Dına men Qurmanǵazynyń týyndylary shyrqaldy. Odan bólek ıÝber Iv Adrıan Jıronyń «Parıj aspanynyń astynda», Jorj Bızeniń «Smıt serenadasy», Nurǵısa Tilendıevtiń «Kel erkem-Alataýyńa», «Pertskaıa krasavıtsa» jáne taǵy da basqa da týyndylary oryndaldy, - deıdi Atyraý oblysy Mádenıet, muraǵattar jáne qujattama basqarmasynyń ókilderi.
«Bizdiń gastroldik sapardyń maqsaty - sheteldik aýdıtorııany qazaqtyń halyqtyq mýzykasymen, salt-dástúrimen, mádenıetimen tanystyrý. Parıj qalasyna kelip, sheteldik turǵyndarǵa osyndaı keremet qazaqtyń ónerin, mádenıeti men kúıin kórsetkenimizge qýanyshtymyz. Búgin tek kúıler ǵana emes, álemdik klassıkalyq shyǵarmalardy da oryndadyq, halyq óte jaqsy qabyldady. Qazaqtyń kúıi shet memleketterdiń tórinde sharyqtaı bersin», - dedi D.Nurpeıisova atyndaǵy orkestrdiń bas dırıjeri Arman Júdebaev.
Osylaısha Parıj halqy qazaq óneriniń qudireti men ulttyq aspaptardyń sheksiz múmkindigine jáne orkestrdiń bas dırıjeri Arman Júdebaevtyń sheberligine tánti boldy.
Aıta ketken jón, orkestr saparlarynda Qazaqstandaǵy Frantsııa elshiliginiń shaqyrtýymen attanǵan. Kontsert Qazaqstan men Frantsııa arasyndaǵy strategııalyq yntymaqtastyqtyń 10 jyl tolýy aıasynda ótkizildi.
