Atyraýlyqtar kólikke 312,8 mln teńge salyq tólemegen
Atyraý qalalyq Memlekettik kirister basqarmasy basshysynyń orynbasary Nurbolat Sarmanovtyń málimetinshe, jyl basynda júrgizýshilerdiń kólik salyǵyna qaryzy 200 mln 647 myń teńge bolǵan.
«Qazir kólik salyǵyn tólemegen 10 868 adamnyń bereshegi 312 mln 842 myń teńgeni qurap otyr. Bul salyqty burynǵydaı bank organdaryna barmaı-aq, «e-Salyq Azamat» jáne «e-Salyq Business» mobıldik qosymshalary arqyly tóleýge bolady. Kólik salyǵy beresheginiń kóbeıýine baılanysty jergilikti polıtsııa jáne sot oryndaýshylarmen birlesip, reıdtik is-sharalardy kúsheıtý máselesin qolǵa alamyz. Óıtkeni, basqa salyq túrlerimen salystyrǵanda, kólik salyǵy edáýir kóbeıip otyr. Ýaqytyly tólenbegen jaǵdaıda kólik salyǵyna sot oryndaýshylary arqyly májbúrlep óndirgeni úshin qosymsha 25% aqy alynady. Kólik salyǵynyń bereshegin tólep úlgerý úshin 1 jyl 3 aı ýaqyt berildi. Aldaǵy ýaqytta osyndaı faktiler taǵy da anyqtalsa, ony turǵyndarǵa ashyq kórsetetin bolamyz», - dedi Nurbolat Sarmanov.
Onyń aıtýynsha, kirister komıteti taksı qyzmetine boıynsha Yandex jáne InDrive jelisindegi kompanııalarmen ekijaqty kelisimshart jasaǵan. Soǵan sáıkes 1 shildede salyq tóleý qosymshasy iske qosylady. Qosymsha arqyly jumys berýshi jáne salyq tóleýshi avtomatty túrde salyqty tóleı alady.
Eske sala ketelik, buǵan deıin 25 myńǵa jýyq atyraýlyq 580 mln teńgeden astam salyǵyn tólemeı júrgenin jazǵan edik.
