Atyraýlyqtar qazaq-orys shekarasynan ótý qıyndyq týǵyzyp otyrǵanyna shaǵymdandy

ATYRAÝ. QazAqparat – Parlament Senatynyń depýtaty Ǵumar Dúısembaev Atyraý oblysyndaǵy Isataı jáne Qurmanǵazy aýdandarynyń turǵyndarymen kezdesti, dep habarlaıdy QazAqparat.

Senator aýyl turǵyndaryna qabyldanǵan zańdardaǵy negizgi jańalyqtar týraly jan-jaqty baıandady.

Ol sondaı-aq, Úkimet basshysynyń atyna joldaǵan birneshe depýtattyq saýaly Atyraý oblysynyń turǵyndary kótergen problemalyq máselelerge arnalǵanyn jetkizdi.

Bıylǵy mamyrda óńirge sapary kezinde senatorǵa Qyzylúı jáne Jasqaırat aýyldarynyń turǵyndary gaz qubyryn tartý máselesin aıtqan edi.

Ǵumar Dúısembaev osy máseleni sheshýge atsalysyp, nátıjesinde qazir qajetti qarjy bólindi.

Sondaı-aq, Naryn sý arnasyn kúrdeli jóndeý máselesi de talqylandy.

Bul sý arnasy 4 eldi meken turǵyndarynyń maly jaıylatyn jaıylym alqabyn sýmen qamtamasyz etedi.

Qurmanǵazy aýdanynyń Asan, Azǵyr, Balqudyq jáne Súıindik aýyldarynda memlekettik shekaradan jeńildetilgen tártippen ótý sharttaryn jaqsartýǵa qatysty suraqtar kóbirek qoıyldy.

Qazir óńir turǵyndary shekarany shekteýli ýaqytta tek jeke avtokólikpen jáne 30 kılogramm júkpen ǵana kesip óte alady.

«Bul másele Qazaqstan men Reseıdiń Syrtqy ister mınıstrlikteri deńgeıinde ǵana emes, eki eldiń Úkimet basshylary tarapynan da qaralyp jatyr. Atalmysh problema QR Parlamenti Senatynyń jáne Reseı Federatsııasy Keńesi Federaldyq Jınalysynyń tóraǵalary men depýtattarynyń kezdesýleri kezinde de kóterildi», -deıdi senator.

Aýyl turǵyndary kótergen taǵy bir másele – jol sapasy.

Senator bul máseleni jergilikti jerde zerdeleý úshin jol mamandarymen, merdiger uıymdardyń ókilderimen birqatar kezdesýler ótkizip, «Atyraý-Astrahan» avtomobıl jolynyń qurylysymen tanysty.

Eske sala ketelik, buǵan deıin Májilis depýtaty jumys saparymen Mahambet aýdanynda bolǵan edi.