Atyraýlyqtar qala mańynan munaı-hımııa keshenin salýǵa narazy - depýtat U.Elýbaev
ASTANA. Aqpannyń 3-i. QazAqparat /Qanat Mámetqazyuly/ ‑ Atyraýlyqtar qala mańynan munaı-hımııa keshenin salýǵa narazy. «Meniń atyma Atyraý qalasynyń turǵyndarynan jáne úkimettik emes uıymdardan úndeýhat kelip tústi. Ondaǵy kóterilip otyrǵan másele búgingi kúni Atyraý qalasy turǵyndaryn alańdatyp otyr. Atap aıtqanda, Atyraý munaı óńdeý zaýyty men «Sınopek Injınırıng» Qytaı kompanııasy benzol óndiretin álemdik deńgeıdegi birinshi ıntegratsııalanǵan munaı-hımııa keshenin salýdy josparlaǵan bolatyn.
Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Uzaqqalı Elýbaev osylaı málim etti, dep habarlaıdy QazAqparat.
Osyǵan oraı, jurtshylyq osy keshenniń Atyraý oblysyndaǵy Qarabatan stansysynda emes, qala ishindegi Atyraý zaýytynyń aýmaǵynda salý týraly kelisimshart jasalǵanyna narazy», dedi depýtat.
Onyń sózine qaraǵanda, Atyraý oblysyndaǵy munaı-hımııa keshenin salý sharalary 2008 jyldan bastalǵan. Jobany 2009 - 2012 jyldary iske asyrý boljanǵan. Benzol óndiretin zaýyt salý jylyna ony 133 myń tonna jáne paraksıloldy jylyna 496 myń tonna kóleminde shyǵarýdy qamtamasyz etedi. «Elimizde munaı óńdeý salasyn damytýǵa baǵyttalǵan is-sharalardy qoldaı otyryp, sonymen qatar qalanyń ekologııalyq jaǵdaıyn eskergen jón dep oılaımyz. Úndeýde kórsetilgendeı, hosh ıisti kómirsýtekter óndirý zaýyty eldi-mekennen kem degende 40-50 shaqyrym jerde ornalasýy qajet. Joǵaryda atalǵan kantserogenderdiń shyǵaryndylary aýaǵa taraǵan jaǵdaıda, qala turǵyndary ekologııalyq zardap shegedi. Halyqtyń densaýlyǵy nasharlap, ómir súrý múmkindigi tómendeıtini belgili. Sondyqtan da, atalǵan keshendi Atyraý munaı óńdeý zaýytynyń aýmaǵynda emes, Qarabatan stansysynyń mańynda salýdy qarastyrý qajet», dedi U. Elýbaev.
