Atyraýlyqtar Astananyń kelbetin sensorlyq ekrannan tamashalaýda
«Bul kórmeelordamyzdyń 20 jyl ishinde damý joldary men tarıhı kezeńderin nasıhattaý arqyly Astananyń abyroıyn asqaqtatý, Táýelsizdigimizdiń boıtumary - Astana kúniniń el ómirindegi tarıhı oqıǵalar tizbeginen oryn alatyn erekshe kún ekenin uǵyndyrý maqsatynda uıymdastyrylyp otyr. Elimizdiń bas qalasy atanǵan Astananyń týǵan kúninde oblystyń rýhanııatyn nasıhattaý maqsatynda tarıhı-ólketaný mýzeıi jyl saıyn halyq nazaryna usynyp, óz úlesin qosyp keledi»,-deıdi mýzeı basshysynyń orynbasary Saıa Ǵazımova.
Turaqty ekspozıtsııada memleket astanasyn kóshirý, ataýyn ózgertý jónindegi tarıhı qujattar, Astananyń qurylysy men damýy, órkendeýi jolyndaǵy ǵımarattar, álemdik sharalar, mańyzdy kezdesýler, halyqaralyq mamandandyrylǵan «EKSPO-2017» kórmesi, Atyraý oblysy tarıhı-ólketaný mýzeıiniń ár jyldarda Astana qalasynda uıymdastyrylǵan kóshpeli kórmelerinen syr shertetin fotosýretter, kitaptar, zattaı jádigerler jáne Astana qalasynyń ortalyq alańynyń maketi ornalasty.
«Atyraý oblysy «EKSPO-2017» kórmesinen 30-ǵa tarta jobany júzege asyrdy. Atap aıtqanda, EKSPO-2017» kórmesinde kóterilgen ıdeıalar, «jasyl ekonomıka», balamaly energetıkany damytý, qorshaǵan ortaǵa óndiris oryndarynyń tıgizer áserin tómendetý boıynsha jobalar Atyraý oblysynda da júzege asyryldy. Kórmege Atyraý oblysynan 83 myń adam qatysty. Astanadaǵy Atyraý oblysynyń kúnderi aıasynda 1 myńǵa jýyq óńir turǵyny ózderiniń ónerlerin Elorda tórinde pash etti», - deıdi ekspozıtsııalyq kórme jumys bóliminiń meńgerýshisi J.Seıitmuhambetova.
Aıta ketken jón, ekspozıtsııada qamtylmaǵan Astana qalasy týraly tolyq málimet qazaq, orys, aǵylshyn tilderinde jáne fotosýretter sensorlyq ekranǵa ornatyldy.
«Astana - ulan ǵaıyr elimizdiń bas qalasy, álem tanyǵan jas qala. Búgingi ekspozıtsııalyq kórme óte joǵary deńgeıde uıymdastyrylǵan. Ózim Astanaǵa barmasam da, nemere-jıenderimmen kórme arqyly tanystyryp júrmin. Ótken aptada Erke Esildiń jaǵalaýynda bizdiń munaıly Atyraýymyzdyń tartýy - kópirimiz ashyldy. Ásem qalamyz Astanamyzdy 20 jasymen quttyqtaımyn», - deıdi kórmeni tamashalaýshy S.Qaıyrǵalıeva.